میاں شہباز شریف نے آئندہ عام انتخابات میں بھی کراچی سے الیکشن لڑنے کا اعلان

یہ بابائے قوم حضرت قائداعظم کا شہر ہے، کماو شہر کے ساتھ سوتیلی ماں کا سلوک ہورہا ہے، شہباز شریف جذباتی ہوگئے دعا ہے کہ میرے مرنے سے پہلے کراچی شہر بدل جائے، کراچی کی خوش حالی کے بغیر پاکستان خوش حال نہیں ہو گا

اتوار 29 اگست 2021 18:45

میاں شہباز شریف نے آئندہ عام انتخابات میں بھی کراچی سے الیکشن لڑنے ..

کراچی (اُردو پوائنٹ اخبارتازہ ترین - این این آئی۔ 29 اگست2021ء) مسلم لیگ نون کے صدر اور قومی اسمبلی میں قائدِ حزبِ اختلاف میاں شہباز شریف نے آئندہ عام انتخابات میں بھی کراچی سے الیکشن لڑنے کا اعلان کیا ہے ،شہبازشریف کا این اے 249 کراچی کے عہدیداروں، کارکنان اور عمائدین علاقہ سے ملاقات میں خطاب کے دوران کراچی کے مسائل کا ذکر کرتے ہوئے اپنے جذبات پر قابو نہ رکھ سکے اور آبدیدہ ہو گئے اور کہا کہ دعا ہے کہ میرے مرنے سے پہلے کراچی شہر بدل جائے۔

انہوں نے کہاکہ یہ بابائے قوم حضرت قائداعظم کا شہر ہے، کماو شہر کے ساتھ سوتیلی ماں کا سلوک ہورہا ہے۔انہوں نے نہایت جذباتی لہجے میں کہا کہ دعا ہے کہ میرے مرنے سے پہلے کراچی شہر بدل جائے، کراچی کی خوش حالی کے بغیر پاکستان خوش حال نہیں ہو گا۔

(جاری ہے)

انہوں نے کہا کہ آئندہ الیکشن میں موقع ملا تو کراچی کی قسمت بدل دیں گے، کراچی کے مسائل کو دیکھ کر دل خون کے آنسو روتا ہے،میاں نواز شریف نے کراچی کا امن لوٹایا، اندھیرے ختم کیئے، کراچی کو سنواریں گے، مسائل سے پاک شہر بنائیں گے۔

انہوں نے کہا کہ ایک جماعت کو نکال کر دیگر جماعتوں کے ساتھ کراچی کی حالت سدھاریں گے، اس ایک جماعت نے 3 سال میں ملک و قوم پر ظلم ڈھایا ہے۔این اے 249 میں آپ نے مجھے ووٹ دیئے لیکن میں کامیاب نہ ہو سکا، محرکات آپ جانتے ہیں۔میاں شہباز شریف نے یہ بھی کہا کہ کراچی میں پانی کا مسئلہ جوں کا توں ہے، یہاں علاج اور تعلیم کے مسائل بھی ہیں جن پر افسوس ہے۔

اس سے قبل میاں شہباز شریف نے تاجروں کے وفد سے ملاقات کی جس کے دوران موجودہ معاشی صورتِ حال اور توانائی کے بحران پر گفتگو ہوئی۔انہوں نے کہاکہ کراچی سفارتی مرکز بھی رہا ہے یہاں مہاجر، سندھی، پنجابی، تنولی، بلوچ، بنگالی، بلوچ ، پشتون دیگر اقوام اورعلاقوں کے لوگ یہاں رہائش پزیر ہیں کیا کمال شہر ہے جس نے ہر کسی کو اپنی گود میں سمایا ہوا ہے اس شہر کی خوشحالی کے بغیر پاکستان خوشحال نہیں ہوگا نوازشریف کی قیادت میںاللہ تعالی نے آئندہ الیکشن میں موقع ملا تو کراچی کی قسمت بدل دیں گے یہاں کے مسائل اور شہریوں کو درپیش مشکلات دیکھ کر دل خون کے آنسو روتا ہے یہ ایک کمال شہر ہے جس نے ہر قومیت، ہر رنگ ونسل اور زبان بولنے والے کو اپنی گود میں لے رکھا ہے پاکستان کے کماو شہر ، سالانہ اربوں کھربوں روپے دینے والے شہر کا یہ حال ہے۔