سابق وزیراعظم نواز شریف کا ایٹمی سائنسدان ڈاکٹر عبدالقدیر خان کو خط

نواز شریف نے محسن پاکستان ڈاکٹر عبدالقدیر کی خیریت دریافت کی، نواز شریف کا ڈاکٹر عبدالقدیر کی طبیعت کی ناسازی پر تشویش کا اظہار، ذرائع

دانش احمد انصاری منگل 14 ستمبر 2021 20:47

اسلام آباد (اُردو پوائنٹ، اخبار تازہ ترین، 14ستمبر 2021) سابق وزیراعظم نواز شریف کا ایٹمی سائنسدان ڈاکٹر عبدالقدیر خان کو خط، خیریت دریافت کی، نواز شریف کا ڈاکٹر عبدالقدیر کی طبیعت کی ناسازی پر تشویش کا اظہار ۔ تفصیلات کے مطابق سابق وزیراعظم نواز شریف نے ایٹمی سائنسدان ڈاکٹر عبدالقدیر خان کی طبیعت کی ناسازی پر تشویش کا اظہار کیا ہے۔نجی ٹی وی کےمطابق سابق وزیراعظم نواز شریف نے ڈاکٹر عبدالقدیر خان کو خط لکھ کر خیریت دریافت کی اور ان کی جلد صحت یابی کیلئے دعا کی۔

ڈاکٹر عبدالقدیر خان نے خیریت دریافت کرنے پر نواز شریف سے اظہار تشکر کرتے ہوئے کہا کہ آپ کیلئے بھی دعا گو ہوں۔واضح رہے کہ گزشتہ روز محسن پاکستان ڈاکٹر عبد القدیر خان نے وزیراعظم یا کسی حکومتی نمائندے کی جانب سے خیریت دریافت نہ کیے جانے پر افسوس کا اظہار کیا تھا۔

(جاری ہے)

ڈاکٹر عبد القدیر خان نے کہا تھا کہ مجھے بہت مایوسی ہے کہ وزیراعظم اور نہ ہی ان کی کابینہ کے کسی رکن نے میری صحت کے بارے میں دریافت کیا۔

نجی ٹی وی کے مطابق محسن پاکستان ڈاکٹر عبدالقدیر کا کہنا تھا کہ جب پوری قوم ان کے لیےجلد صحتیابی کی دعائیں مانگ رہی تھی تو ایک بھی سرکاری عہدیدار نے میری صحت کے بارے میں دریافت کرنے کے لیے ٹیلی فون تک نہیں کیا تھا۔ اپنی صحت سے متعلق بات کرتے ہوئے ڈاکٹر عبد القدیر خان نے کہا کہ میری حالت بہتر ہو رہی ہے اور مجھے باقاعدگی سے مصنوعی آکسیجن لینے کی ضرورت نہیں رہی۔

بعض اوقات ڈاکٹرز محسوس کرتے ہیں تو مجھے آکسیجن دیے دیتے ہیں۔ انہوں نے بتایا کہ ڈاکٹرز کی ایک ٹیم پیر (آج) کو مکمل معائنہ کرے گی جس کی بنیاد پر میرے گھر جانے یا ہسپتال میں رکنے کا فیصلہ ہوگا۔ سرکاری خبر رساں ادارے ایسوسی ایٹڈ پریس آف پاکستان (اے پی پی) کے مطابق 85 سالہ کووڈ 19 کے مثبت ٹیسٹ کے بعد 26 اگست کو خان ریسرچ لیبارٹریز اسپتال میں داخل ہوئے جہاں سے انہیں راولپنڈی کے ملٹری اسپتال منتقل کیا گیا۔

کچھ دنوں قبل ڈاکٹر عبد القدیر خان کے انتقال کی خبریں بھی گردش کرتی رہیں۔ جس پر رد عمل دیتے ہوئے محسن پاکستان ڈاکٹر عبد القدیر خان نے کہا کہ بعض ناشکرے لوگوں نے میری موت کی جعلی خبریں چلائی ہیں لیکن میں اپنے چاہنے اور محبت کرنے والوں سمیت پوری قوم کو بتانا چاہتا ہوں کہ میں ابھی زندہ ہوں اور تیزی سے صحت یاب ہو رہا ہوں۔ یاد رہے کہ ڈاکٹر عبد القدیر خان کو وینٹی لیٹر پر رکھا گیا تھا کیونکہ انفیکشن کی وجہ سے اس کی صحت خراب ہوگئی تھی۔ تاہم ڈاکٹرز کے مطابق اب ان کی صحت بہتر ہو رہی ہے اور انہیں جلد ہی گھر منتقل کرنے کا امکان ہے۔