خیبرپختونخواہ میں کورونا تشویشناک ضلع میں سکول بند جبکہ پنجاب میں کھولنے کا اعلان

این سی اوسی نے پنجاب اور خیبرپختونخواہ کے6 اضلاع میں کورونا صورتحال کو تشویشناک قرار دیا تھا، ضلع بنوں کے تمام تعلیمی ادارے 22 ستمبر تک بند رہیں گے۔ محکمہ تعلیم خیبرپختونخواہ

ثنااللہ ناگرہ بدھ 15 ستمبر 2021 19:50

پشاور (اردوپوائنٹ اخبارتازہ ترین۔ 15ستمبر2021ء) خیبرپختونخواہ میں کورونا تشویشناک ضلع میں سکول بند جبکہ پنجاب میں کھول دیے گئے، این سی اوسی نے پنجاب اور خیبرپختونخواہ کے6 اضلاع میں کورونا صورتحال کو تشویشناک قرار دیا تھا، خیبرپختونخواہ کے باقی اضلاع میں50 فیصد حاضری کے ساتھ تعلیمی ادارے کھول دیے گئے۔ خیبرپختونخواہ حکومت نے این سی اوسی فیصلے کے تحت ضلع بنوں میں سکول بند رکھنے اور باقی اضلاع میں50 فیصد حاضری کے ساتھ تعلیمی ادارے کھولنے کااعلان کردیا ہے۔

اعلامیہ محکمہ تعلیم خیبرپختونخوا کے مطابق خیبرپختونخوا میں تعلیمی ادارے کل 16 ستمبر سے کھولنے کا فیصلہ کیا گیا ہے، جس کے تحت خیبرپختونخوا میں تعلیمی ادارے کل سے 50 فیصد حاضری کے ساتھ کھول دیے جائیں، ہفتے میں تین دن کلاسز ہوں گی۔

(جاری ہے)

تاہم زیادہ کورونا کیسز کے زیادہ شرح والے ضلع بنوں میں تعلیمی ادارے بند رکھنے کا فیصلہ کیا گیا ہے۔ ضلع بنوں کے تمام تعلیمی ادارے 22 ستمبر تک بند رہیں گے۔

اس کے برعکس محکمہ تعلیم پنجاب نے این سی اوسی کے کورونا کیسز کے تشویشناک 5 اضلاع میں 50 فیصد حاضری کے ساتھ لاہور، فیصل آباد، ملتان، سرگودھا، گجرات میں سکول کھولنے کا نوٹیفکیشن جاری کردیا ہے۔ گزشتہ روز وفاقی وزیر منصوبہ بندی اور چیئرمین این سی اسی اسد عمر نے پریس کانفرنس کرتے ہوئے کہا تھا کہ ملک کے ہسپتالوں میں انتہائی نگہداشت کی وارڈز میں کوویڈ19 کے مریضوں کا دباؤ ہے، کوشش ہے آکسیجن کی فراہمی میں رکاوٹ نہ آئے، چند ہفتے کے دوران آکسیجن کی طلب میں اضافہ ہوا، وبا کی صورتحال بہتر ہوئی ہے مگر خطرہ مکمل طور پر ختم نہیں ہوا، کوویڈ19 کے 5300 مریض ہسپتالوں میں آکسیجن پر ہیں، لاپرواہی، ایس او پیز کو نظرانداز کرنا کورونا کیسز میں اضافے کا باعث بنا ہے۔

اسد عمر نے کہا کہ 24 میں سے 18اضلاع میں وبا کی صورتحال میں بہتری آئی ہے، 6 اضلاع میں بندشیں قائم رہیں گی، ان اضلاع میں لاہور، فیصل آباد، ملتان، سرگودھا، گجرات اور بنوں شامل ہیں۔ 6 اضلاع میں آؤٹ ڈور ڈائننگ کا ٹائم بڑھا کر 12 بجے تک کیا جا رہا ہے۔ انہوں نے کہا کہ ہم نے ملک کے 24 اضلاع میں کیسز کی تعداد کے پیش نظر 4 سے 15 ستمبر تک زائد بندشیں عائد کی تھیں، مذکورہ 18 اضلاع میں بھی کورونا پابندیاں قائم رکھیں گی جس طرح ملک کے دیگر حصوں میں نافذ ہیں جبکہ دیگر 6 اضلاع میں زائد بندشیں قائم رہیں گی۔ 18 اضلاع میں انٹر بس سروس کو بھی 50 فیصد مسافروں کے ساتھ چلانے کی اجازت ہوگی۔پارکس اور جمز بھی مکمل ویکسی نیٹڈ افراد کیلئے کھول دیے جائیں گے۔