بلاول کا زرعی ایمرجنسی لگا کر کسان کو بیج کھاد مفت دینے اور بجلی کے بل معاف کرنے کا مطالبہ

مظفرگڑھ ( اُردو پوائنٹ اخبارتازہ ترین۔ 08 ستمبر2025ء ) پاکستان پیپلز پارٹی کے چیئرمین بلاول بھٹو نے سیلاب کی بتاہ کاریوں کے باعث زرعی ایمرجنسی لگا کر کسان کو بیج اور کھاد مفت دینے کا مطالبہ کردیا۔ مظفر گڑھ میں میڈیا سے گفتگو کرتے ہوئے انہوں نے کہا کہ لاہور اور قصور کا دورہ کیا، ملتان بھی گیا، سیلاب سے پورا پاکستان متاثر ہوا مگر سب سے زیادہ نقصان پنجاب میں ہوا، پنجاب کا کسان سب سے زیادہ متاثر ہوگا، جنوبی پنجاب کے عوام بھی مشکل سے گزر رہے ہیں، اس لیے ضروری ہے کہ زرعی ایمرجنسی نافذ کر کے کسان کو بیج اور کھاد مفت یا آسان اقساط پر دی جائے۔

چیئرمین پی پی نے کہا کہ ہر قدرتی آفت میں تین مراحل ریسکیو، ریلیف اور بحالی و تعمیر نو ہوتے ہیں، قدرتی آفت کے بعد نقصان کو پورا کرنے کی کوشش کی جائے، وزیراعظم سے درخواست کی ہے کہ بی آئی ایس پی کے ذریعے مالی مدد کی جاسکتی ہے، بی آئی ایس پی کے ذریعے پہلے بھی وفاق نے مالی مدد پہنچائی، سیلابی پانی اب سندھ کی طرف بھی بڑھنا ہے، امید ہے وزیراعظم جلد میری تجویز پر غور کرکے متاثرین تک مالی مدد پہنچائیں گے۔

(جاری ہے)

بلاول بھٹو کا کہنا ہے کہ وفاق اور صوبائی حکومتوں سے درخواست ہے ہمیں فوری زرعی ایمرجنسی نافذ کرنی چاہیئے، حکومت کسان کو بیج اورکھاد مفت میں دے یا آسان اقساط پر دے، زرعی ایمرجنسی کے اعلان سے کسانوں کو ریلیف مل سکتا ہے، جب تک سیلاب ختم نہیں ہوتا کسانوں کا بجلی بل معاف کرنا چاہیئے، پی ڈی ایم دور میں بطور وزیر خارجہ سیلاب متاثرین کیلئے نئے گھروں کا منصوبہ دیا تھا، ہمیں اس سیلاب میں بھی متاثرین کیلئے گھروں کا انتظام کرنا پڑے گا۔

انہوں نے کہا کہ اقوام متحدہ کی مقامی انتظامیہ کے ذریعے عالمی سطح پر سیلاب متاثرین کیلئے آواز بلند کرنی چاہیئے، اس وقت سیاست کو بھول کر عوام کا ساتھ دینا چاہیئے،عالمی سطح پر بھی بہت سے دوست چاہتے ہیں کہ وہ پاکستان کے سیلاب متاثرین کی مدد کریں، اگر ہم عالمی سطح پر اس وقت آواز بلند نہیں کریں گے تو بہت دیر ہوجائے گی، یہ سیاسی بیان بازی یا آپسی اختلاف کا موقع نہیں ہے، پنجاب کا میڈیا اس سیلابی صورتحال میں مثبت رپورٹنگ کررہا ہے، میں امید کرتا ہوں سندھ کا میڈیا بھی پنجاب والوں سے کچھ سیکھے گا۔

چیئرمین پیپلزپارٹی کہتے ہیں کہ پبلک پرائیویٹ سیکٹر بھی سیلاب متاثرین کی مدد کررہا ہے، حکومت کے پاس مدد کرنے کیلئے سب سے مؤثر ہتھیار بی آئی ایس پی پروگرام ہے، ہر کوئی اپنی کوشش کررہا ہے کہ وہ انسانیت کی خدمت کرے، ہمیں آئندہ ایسی صورتحال کیلئے بھی میکانزم بنانے کا سوچنا ہوگا، اس وقت سب کی کوشش یہی ہے کہ متاثرین کی مدد کی جائے، ہم اس وقت قدرتی آفت اورسیلابی صورتحال پر زور دینا چاہتے ہیں، اس وقت صرف سیلاب متاثرین کیلئے دورے کررہا ہوں۔