انگلش بورڈ کو ناصرف الفاظ بلکہ اپنے عمل سے بھی پی سی بی کا ساتھ دینا چاہیے: شاہد آفریدی

انگلش بورڈ کو کورونا کی بدترین صورتحال میں پاکستان کے گزشتہ برس کے دورے کو یاد رکھنا چاہیے: سابق کپتان

ذیشان مہتاب اتوار 19 ستمبر 2021 13:14

انگلش بورڈ کو ناصرف الفاظ بلکہ اپنے عمل سے بھی پی سی بی کا ساتھ دینا ..

لاہور (اردو پوائنٹ تازہ ترین اخبار ۔ 19 ستمبر 2021ء ) قومی کرکٹ ٹیم کے سابق کپتان شاہد آفریدی کا کہنا ہے کہ نیوزی لینڈ کے عین وقت پر ساتھ چھوڑ جانے کی صورتحال میں انگلش کرکٹ بورڈ کو پی سی بی کا اپنے عمل سے ساتھ دینا چاہیے۔ انہوں نے ٹوئٹر پر جاری بیان میں کہا کہ ’یہ انگلش کرکٹ بورڈ کا پاکستان کا ساتھ دینے کا وقت ہے۔ شاہد آفریدی کا کہنا تھا کہ انگلش بورڈ کو ناصرف الفاظ بلکہ اپنے عمل سے بھی پاکستان کرکٹ بورڈ کا ساتھ دینا چاہیے۔

اپنے ٹویٹ میں سابق کپتان نے کہا کہ نیوزی لینڈ کے سر چکرا دینے والے فیصلے کے باوجود پاکستان دورے کے لیے ایک محفوظ جگہ ہے۔ انہوں نے یہ بھی کہا کہ ایسی صورتحال میں انگلش بورڈ کو کورونا کی بدترین صورتحال میں پاکستان کے گزشتہ برس کے دورے کو یاد رکھنا چاہیے‘۔

(جاری ہے)

It’s time for @ecb_cricket to show their appreciation of @therealpcb through actions and not words. Despite the mind boggling @blackcaps decision, Pakistan remains a safe place to tour. ECB shouldn't forget our support for them last year in a very tough Covid-19 situation.
— Shahid Afridi (@SAfridiOfficial) September 18, 2021

واضح رہے کہ گزشتہ روز نیوزی لینڈ کے عین وقت پر سیریز منسوخ کرنے کے بعد انگلش کرکٹ بورڈ (ای سی بی) نے آئندہ ماہ ہونے والے دورہ پاکستان کے حوالے سے بیان جاری کیا تھا۔

ای سی بی نے اپنے بیان میں کہا تھا کہ پاکستان کے دورے کے بارے میں فیصلہ اگلے 24 تا 48 گھنٹے میں کریں گے کیونکہ انگلش کرکٹ بورڈ اپنی سکیورٹی ٹیم سے پاکستان کے بارے میں رائے حاصل کررہا ہے۔ پاکستان اور نیوزی لینڈ کے درمیان گزشتہ روز راولپنڈی میں 3 ایک روزہ میچز کی سیریز کا پہلا مقابلہ ہونا تھا تاہم نیوزی لینڈ کرکٹ بورڈ نے عین وقت پر دورہ ختم کردیا جس کی وجہ سکیورٹی خدشات بتائی ہے۔