Live Updates

امریکا کی افغانستان کے شہر قندھار میں ہونے والے خود کش دھماکے کی مذمت

افغان عوام کو عقیدے کے مطابق امن و تحفظ کے ساتھ رہنے کا حق ہے،ترجمان امریکی محکمہ خارجہ کا بیان

ہفتہ 16 اکتوبر 2021 14:57

امریکا کی افغانستان کے شہر قندھار میں ہونے والے خود کش دھماکے کی مذمت

واشنگٹن(اُردو پوائنٹ اخبارتازہ ترین - این این آئی۔ 16 اکتوبر2021ء) امریکی محکمہ خارجہ کی جانب سے افغانستان کے شہر قندھار میں ہونے والے خود کش دھماکے کی مذمت کی گئی ہے۔میڈیارپورٹس کے مطابق جاری کیئے گئے ایک بیان میں امریکی محکمہ خارجہ نے قندھار دھماکے میں ہلاک و زخمی ہونے والے افراد کے اہلِ خانہ سے اظہارِ افسوس کیا ۔

(جاری ہے)

ترجمان امریکی محکمہ خارجہ کا کہنا تھا کہ افغانستان میں 1 ماہ کے دوران کیا گیا یہ تیسرا حملہ ہے، افغان عوام کو عقیدے کے مطابق امن و تحفظ کے ساتھ رہنے کا حق ہے۔

واضح رہے کہ افغانستان کے شہر قندھار میں گزشتہ روز ہونے والے خود کش دھماکے میں ہلاکتیں 47 ہو گئی ہیں۔افغان میڈیا کے مطابق قندھار میں ہونے والے خود کش دھماکے کی ذمے داری داعش نے قبول کر لی ۔اس حوالے سے داعش کا کہنا تھا کہ 2 خود کش حملہ آوروں نے مسجد کے گارڈز پر فائرنگ کرنے کے بعد خود کو دھماکے سے اڑا لیا۔قندھار میں ہونے والے خودکش دھماکے کی اقوامِ متحدہ سمیت عالمی سطح پر مذمت کی گئی ہے۔