صوابی ؛ شوہر نے فائرنگ کر کے بیوی اور 2 بیٹیوں کو موت کے گھاٹ اتار دیا

صوابی ( اُردو پوائنٹ اخبارتازہ ترین ۔ 17 اکتوبر 2021ء ) صوبہ خیبرپختونخوا کے ضلع صوابی میں شوہر نے فائرنگ کر کے بیوی اور 2 بیٹیوں کو موت کے گھاٹ اتار دیا ، خاتون نومولود کو اغواء کرنے کے الزام میں 7 روز قبل ہی ضمانت پر رہا ہوئی تھی۔ تفصیلات کے مطابق قتل کا یہ واقعہ صوبہ خیبرپختونخوا کے ضلع صوابی کے علاقے کالو خان میں پیش آیا جہاں ایک شخص نے اپنے بھانجے کے ساتھ مل کر بیوی اور بیٹیوں پر فائرنگ کردی جس کے نتیجے میں اس کی بیوی اور 2 بیٹیاں موقع پر ہی جاں بحق ہو گئیں۔

پولیس کی جانب سے انکشاف کیا گیا ہے کہ خاتون نے ایک ماہ قبل مردان کے ہسپتال سے نومولود کو اغوا کیا تھا ، بچے کو خاتون کے گھر سے بازیاب کر کے ملزمہ کو گرفتار کیا گیا تھا جس کے بعد 7 روز قبل ہی ضمانت پر رہا ہوئی تھی جس کو ملزمان قتل کرکے جائے وقوعہ سے فرار ہو گئے جن کی تلاش جاری ہے۔

(جاری ہے)

دوسری طرف سوبہ پنجاب کے ضلع فیصل آباد کے علاقے جڑانوالہ کے چک 583 گ ب میں ایک نوجوان اپنی ہی بہن کے ہاتھوں بے دردے سے قتل ہو گیا ، شادی شدہ خاتون نے تیز دھار آلے سے اپنے سوئے ہوئے بھائی پر اچانک پے درپے وار کیے جس کے نتیجے میں نوجوان موقع پر ہی دم توڑ گیا ، پولیس نے واقعے کی اطلاع ملنے کے بعد جائے وقوعہ پر پہنچ کر ناصرف ملزمہ کو حراست میں لے لیا گیا، بلکہ آلہ قتل بھی برآمد کر لیا گیا۔

پولیس کے مطابق ملزمہ اپنے سسرال سے ناراض ہو کر میکے آئی تھی اور کچھ عرصہ سے میکے میں ہی موجود تھی ، اس صورتحال میں ملزمہ کو اس کے بھائی نے سمجھانے کی کوشش کی اور اصرار کیا کہ وہ اپنے سسرال واپس چلی جائے ، گزشتہ رات کو بھی مقتول نے ایک مرتبہ پھر اپنی بہن کے سامنے اصرار کیا کہ وہ اپنے سسرال واپس چلی جائے، اسی بات پر دونوں کے درمیان جھگڑا ہوا اور پھر بہن نے اگلی صبح اپنے ہی ہاتھوں سے اپنے بھائی کی جان لے لی ، مقتول کی لاش کا پوسٹ مارٹم کروایا جا رہا ہے، جب کہ معاملے کی تفتیش کا بھی آغاز کر دیا گیا ہے۔