پاکستان میں 70 سالہ مہنگائی کا ریکارڈ ٹوٹنے والی خبریں گمراہ کن ہے

ملک میں موجودہ مہنگائی9 فیصد ہے، حکومتی کوششوں سے آٹا، چینی اور سبزیوں کی قیمتوں میں کمی آنا شروع ہوگئی ہے، عوام کوٹارگٹڈ سبسڈی کے ذریعے ریلیف دیا جائے گا۔ ترجمان مشیرخزانہ مزمل اسلم

ثنااللہ ناگرہ منگل 26 اکتوبر 2021 21:35

پاکستان میں 70 سالہ مہنگائی کا ریکارڈ ٹوٹنے والی خبریں گمراہ کن ہے

اسلام آباد (اُردوپوائنٹ اخبار تازہ ترین۔ 26 اکتوبر2021ء) ترجمان مشیر خزانہ مزمل اسلم نے کہا ہے کہ پاکستان میں 70 سالہ مہنگائی کا ریکارڈ ٹوٹنے والی خبریں گمراہ کن ہے، ملک میں موجودہ مہنگائی9 فیصد ہے، حکومتی کوششوں سے آٹا، چینی اور سبزیوں کی قیمتوں میں کمی آنا شروع ہوگئی ہے، عوام کوٹارگٹڈ سبسڈی کے ذریعے ریلیف دیا جائے گا۔ انہوں نے ٹویٹر پر مہنگائی پر اپنے بیان میں کہا کہ پاکستان میں 70سالہ مہنگائی سے متعلق نیوز رپورٹ گمراہ کن ہے۔

جس نے یہ رپورٹ بنائی ہے اسے ستر سال کی تاریخ کا نہ اندازہ ہے اور نہ ہی موجودہ زمینی اور عالمی حقائق سے آگاہی ہے۔ رپورٹ کا عنوان اورمضمون میں دئیے گئے ڈیٹامیں کوئی ربط نہیں ہے۔ مہنگائی پر تمام ڈیٹا پاکستان بیورآف شماریات دیتی ہے۔

(جاری ہے)

عنوان میں ذکر ہے کہ پاکستان میں ستر سالہ مہنگائی کا ریکارڈ ٹوٹ گیا۔ مضمون میں صرف تین چار اشیاء کے مہنگے ہونے کی نشاندہی کی گئی ہے۔

اعدادوشمار سے غلط ہیڈ لائن لگا کر سنسنی پھیلانے کی کوشش کی گئی ہے۔ انہوں نے کہا کہ مہنگائی کا درست موازنہ CPI سے ہی کیا جاسکتا ہے جوکہ 365آئٹمز اربن میں 244آئٹمز رورل میں لے کر مرتب کی جاتی ہے۔ اس وقت صورتحال یہ ہے کہ دنیا مہنگائی کی لپیٹ میں ہے۔ چین سے جرمنی تک کئی دہائیوں کے مہنگائی کے ریکارڈ ٹوٹ چکے ہیں۔ ملک میں موجودہ مہنگائی نو فیصد کے حساب سے ہے جو کم و بیش اس سال کے ٹارگٹ کے قریب اور گزشتہ سال سے کم ہے۔

عالمی مہنگائی کے باوجودحکومت اپنی تمام تر کوششیں بروئے کار لا رہی ہے تاکہ مہنگائی کے اثرات عوام تک کم سے کم پہنچیں۔ انہوں نے کہا کہ حکومت کی مسلسل کوششوں کی وجہ سے آٹا، چینی اور سبزیوں کی قیمتوں میں کمی آنا شروع ہوگئی ہے اور آئندہ آنے والے دنوں میں کھانے کا گھی اور تیل کے ٹیکسز کی شرح کو کم کرنے کے لئے بھی اقدامات کئے جارہے ہیں۔ حکومت عوام کوٹارگٹڈ سبسڈی کے ذریعے ریلیف دینے کی پالیسی پر عملدرآمد کررہی ہے۔ انہوں نے کہا کہ عوام کی فی کس آمدنی میں اضافہ مہنگائی کی شرح سے نسبتا زیادہ ہواہے۔ اگر ماضی پر نگاہ ڈالی جائے تو مختلف ادوار میں مہنگائی کی شرح آج سے کئی زیادہ رہی ہے۔