چٹاٹاگانگ ٹیسٹ، عابد علی کوشاندار کارکردگی دکھانے پر پلیئر آف دی میچ کا ایوارڈ دیاگیا

منگل 30 نومبر 2021 21:13

چٹا کانگ (اُردو پوائنٹ اخبارتازہ ترین - آن لائن۔ 30 نومبر2021ء) چٹاگانگ ٹیسٹ میں شاندار کارکردگی دکھانے پر عابد علی کو پلیئر آف دی میچ کا ایوارڈ دیا گیا۔پی سی بی کے ٹوئٹر اکانٹ پر جاری ویڈیو بیان میں عابد علی نے کہا کہ ڈومیسٹک کرکٹ کھیلتا ہوا آرہا ہوں، پر اعتماد تھا اور ایک اچھی پارٹنر شپ ہی لگانی تھی۔انہوں نے کہا کہ مین آف دی میچ قرار دیے جانے کی بہت خوشی ہے جس کا کریڈٹ ڈومیسٹک میں کھیلنے کو جاتا ہے، ڈومیسٹک کرکٹ کھیلنے سے مجھے اعتماد ملا ہے، پہلی اننگز میں سنچری مکمل کی مگر دوسری میں نہ کر سکا جس کا افسوس ہے لیکن یہ کھیل کا حصہ ہے اور خوشی ہے کہ ہم میچ جیت گئے۔

عابد علی کا کہنا تھا کہ آئی سی سی مینز ورلڈ ٹیسٹ چیمپئین شپ ہمارے لیے بڑی اہم ہے، پہلا ٹیسٹ ہم نے جیت لیا ہے اور اب دوسرے ٹیسٹ میچ کو دیکھ رہے ہیں، ہماری کوشش ہے کہ ٹیسٹ چیمپیئن شپ کے پوائنٹس ٹیبل میں اوپر کی طرف بڑھتے جائیں۔

(جاری ہے)

عابد علی 4 دسمبر سے شروع ہونے والے دوسرے ٹیسٹ میچ کے لیے بھی خاصے پرعزم نظر آئے۔انہوں نے کہا کہ دوسرے میچ میں بھی اسی مومنٹم کو لے کر چلوں گا، یہ پرفارمنس اب ماضی کا حصہ بن چکی جس کے بعد اب ڈھاکا میں بھی مثبت مائنڈ سے کھیلنا ہے۔اس موقع پر عابد علی نے ساتھی اوپنر عبد اللہ شفیق کی تعریف کرتے ہوئے کہا کہ انہوں نے اچھی بیٹنگ کے ذریعے بہت مدد کی ہے میری نیک خواہشات ان کے ساتھ ہیں۔