ویسٹ انڈیزکرکٹ ٹیم کا دورہ پاکستان،نیشنل اسٹیڈیم کراچی میں کھیلے جانے والے میچز کے حوالے سے محکمہ داخلہ سندھ میں اہم اجلاس

مہمان ٹیم کو فول پروف سیکیورٹی فراہم کرنے کا عزم،میچز کے پرامن انعقاد کو یقینی بنانے کے لیے تمام دستیاب وسائل بروئے کار لانے کا فیصلہ

منگل 30 نومبر 2021 21:35

ویسٹ انڈیزکرکٹ ٹیم کا دورہ پاکستان،نیشنل اسٹیڈیم کراچی میں کھیلے جانے ..

کراچی (اُردو پوائنٹ اخبارتازہ ترین - آن لائن۔ 30 نومبر2021ء) ویسٹ انڈیز کرکٹ ٹیم کے دورہ پاکستان اور نیشنل اسٹیڈیم کراچی میں کھیلے جانے والے میچز کے حوالے سے محکمہ داخلہ سندھ میں اہم اجلاس منعقد ہوا۔ اجلاس کی صدارت ایڈیشنل چیف یکریٹری داخلہ قاضی شاہد پرویز نے کی۔ایڈیشنل آئی جی اسپیشل برانچ غلام نبی میمن، ایڈیشنل آئی جی آپریشنز امیر شیخ، ڈی آئی جی سیکیورٹی اینڈ ایمرجنسی سروسز ڈویڑن مقصود احمد، کمانڈنٹ ایس ایس یو ذیشان شفیق صدیقی، ایس ایس پی ایسٹ قمر رضا جسکانی، ایس ایس پی ساؤتھ زبیر، آرمی، رینجرز اور پی سی بی کے حکام اور تمام اسٹیک ہولڈرز نے اجلاس میں شرکت کی۔

ڈی آئی جی سیکیورٹی مقصود احمد نے میچز کے دوران کئے جانے والے سیکورٹی انتظامات کے بارے میں بریفنگ دی۔

(جاری ہے)

انہوں نے بتایا کہ سیکیورٹی ڈویڑن کے اہلکار بشمول ایس ایس یو کمانڈوز اور لیڈی کمانڈوز دیگر قانون نافذ کرنے والے اداروں کے اہلکاروں کے ساتھ نیشنل اسٹیڈیم کراچی، کراچی ایئرپورٹ، شاہراہوں، ہوٹلز اور دیگر مقامات پر سیکیورٹی کے فرائض انجام دیں گے جب کہ حساس مقامات پر شارپ شوٹرز بھی تعینات کیے جائیں گے۔ شرکائ نے دورہ کرنے والی ٹیم کو فول پروف سیکیورٹی فراہم کرنے کا عزم کیا اور میچز کے پرامن انعقاد کو یقینی بنانے کے لیے تمام دستیاب وسائل بروئے کار لانے کا فیصلہ کیا۔