Live Updates

منی بجٹ میں کاسمیٹکس، ڈبہ بند خوراک اور لگژری آئٹمز مہنگی ہوجائیں گی

بجٹ میں امپورٹڈ گاڑیاں بھی اضافی ٹیکس سے مہنگی ہوجائیں گی، پیٹرولیم مصنوعات پرسیلزٹیکس ریفائنری اسٹیج پر لاگو ہوگا

ثنااللہ ناگرہ جمعرات 2 دسمبر 2021 18:28

منی بجٹ میں کاسمیٹکس، ڈبہ بند خوراک اور لگژری آئٹمز مہنگی ہوجائیں گی

اسلام آباد (اردوپوائنٹ اخبارتازہ ترین۔ 02 دسمبر2021ء) حکومت نے منی بجٹ تیار کرلیا ہے، جس سے کاسمیٹکس، ڈبہ بند خوراک اور لگژری آئٹمز مہنگی ہوجائیں گی، بجٹ میں امپورٹڈ گاڑیاں بھی مہنگی ہوجائیں گی، پیٹرولیم مصنوعات پر سیلزٹیکس ریفائنری اسٹیج پر لاگو ہوگا۔ جیو نیوز کے مطابق منی بجٹ میں ایف بی آر سیلز ٹیکس چھوٹ کو واپس لے رہا ہے، جس سے مہنگائی مزید بڑھ جائے گی۔

منی بجٹ میں لگژری اشیاء کی درآمدات پر ٹیکس لگائے جائیں گے، منی بجٹ سے کاسمیٹکس، ڈبہ بند خوراک، لگژری آئٹمز اور امپورٹڈ گاڑیاں بھی مہنگی ہوجائیں گی، پیٹرولیم مصنوعات پرسیلزٹیکس ریفائنری اسٹیج پر لاگو ہوگا، اشیائے خوردونوش اورادویات پر ٹیکس چھوٹ برقرار رہے گی۔ چیئرمین ایف بی آرڈاکٹر اشفاق احمد کا کہنا ہےکہ منی بجٹ تیار ہے، حکومت جب کہے گی پیش کردیں گے۔

(جاری ہے)

دوسری جانب مسلم لیگ (ن) کے صدر اور قائد حزب اختلاف شہبازشریف نے منی بجٹ مسترد کرتے ہوئے کہا کہ منی بجٹ لانے کے اعلان سے ثابت ہوگیا کہ قومی بجٹ کے موقع پر حکومت نے قوم اور کاروباری برادری سے جھوٹ بولا ،منی بجٹ لانے والے کہتے تھے کہ کوئی منی بجٹ نہیں آئے گا، عمران نیازی نے ایک اور یوٹرن لیا ہے ،یہ منی بجٹ نہیں، معاشی تباہی، مہنگائی کا سیاہ طوفان ہے جو پاکستان کی معیشت، صنعت ، روزگار اجاڑ دے گا ،منی بجٹ قومی معیشت کے تابوت میں آخری کیل ثابت ہوگا ۔

موجودہ حکومت ہر ماہ مہنگائی، نااہلی کے اپنے ہی ریکارڈ توڑ رہی ہے ،گھی 10 روپے مہنگا ہوکر 360 روپے کلو ہوگیا، آٹے، چینی کے بعد گھی مسلسل مہنگا ہورہا ہے ،ایک سال میں بجلی 73 روپے، پٹرول41 اور ڈیزل 37 فیصد مہنگا ہوا۔ عالمی منڈی میں تیل کی قیمت میں کمی کے باوجود عوام کو ریلیف نہیں دیاجارہا ،انہوںنے کہاکہ برآمدات میں اضافہ دکھانے والی حکومت نے درآمدات کے اعدادوشمار چھپالئے، ،نومبر میں برآمدات2.90 ارب ڈالر کے مقابلے میں درآمدات پونے 8 ارب ڈالر بتائی جارہی ہیں جو ریکارڈ ہے۔ برآمدات میں اضافے کے حکومتی دعوے صحیح ہیں تو پھر ڈالر کی قیمت کیوں کنٹرو ل میں نہیں۔