کامسٹیک کے کوارڈینیٹر جنرل پروفیسر اقبال چوہدری کے لئے غیر ملکی ایوارڈ

قازقستان میں منعقدہ ایک تقریب کے دوران یہ انعام عطا کیا گیا ، بین الاقوامی مرکز جامعہ کراچی کا بیان

پیر 30 مئی 2022 17:15

کراچی(اُردو پوائنٹ اخبارتازہ ترین - این این آئی۔ 30 مئی2022ء) بین الاقوامی مرکز برائے کیمیائی و حیاتیاتی علوم (آئی سی سی بی ایس) جامعہ کراچی کے سربراہ اور کامسٹیک کے کوارڈینیٹر جنرل پروفیسر ڈاکٹرمحمد اقبال چوہدری کوقازقستان میں سائینسی و تعلیمی خدمات انجام دینے کے اعتراف میں انٹرنیشنل ٹرکک اکیڈمی کی جانب سے الفارابی انٹر نیشنل گولڈ میڈل دیا گیا ہے۔

آئی سی سی بی ایس، جامعہ کراچی کے ترجمان نے پیر کو کہا ہے کہ انٹرنیشنل ٹرکک اکیڈمی کے صدر ڈاکٹر درخن کیدر لی نے الماتے قازقستان میں منعقدہ انٹر نیشنل الفارابی و اقبال فورم (۶۲ تا۷۲ مئی) کے دوران پروفیسر اقبال چوہدری کو الفارابی انٹر نیشنل گولڈ میڈل اورسند عطا کی۔واضح رہے کہ حال ہی میں مسلم دنیا کا سب سے بڑا سائینس اور ٹیکنالوجی کا اعزاز ’مصطفیٰ ؐ پرائز برائی2021‘ بھی پروفیسر اقبال چوہدری کو دیا گیا ہے جو ایک معروف میڈیسنل کیمسٹ ہیں۔

(جاری ہے)

ترجمان کے مطابق پروفیسر اقبال چوہدری نے آرگینک اور بائیو آرگینک کیمسٹری کے شعبے میں گراں قدر خدمات انجام دی ہیں اس ضمن میں ان کی تقریباً1175سائنسی اشاعتیں بین الاقوامی سطح پر شائع ہوچکی ہیں، امریکہ اور یورپ میں انکی تحریرو ادارت کردہ76کتب شائع ہوچکی ہیں، اس کے علاوہ40انٹرنیشنل اور یو ایس پیٹینٹ بھی قابل ذکر ہیں۔ مزیدبرآں ڈاکٹرمحمد اقبال چوہدری کیمیاء سے متعلق متعدد غیرملکی کتب و جرائد کے مدیر ہیں جبکہ ان کے سائنسی کام کو30ہزار مرتبہ بطور حوالہ پیش کیا گیا ہی, بین الاقوامی اعزازات کے حامل ہونے کے ساتھ ساتھ ان کو حکومتِ پاکستان کی جانب سے تمغہٴ امتیاز، ستارہٴ امتیازاور ہلالِ امتیاز بھی عطا کیا جاچکا ہے۔

شیخ الجامعہ کراچی پروفیسر ڈاکٹر ناصرہ خاتون اور سرپرستِ اعلیٰ بین الاقوامی مرکز اور سابق وفاقی وزیر برائے سائینس اور ٹیکنالوجی پروفیسر ڈاکٹر عطا الرحمن نے بھی پروفیسر اقبال چوہدری کو انکی اس کامیابی پر مبارکباد دی ہے۔