فاطمہ جناح ویمن یونیورسٹی میں فیکلٹی ڈویلپمنٹ انٹرنیشنل کانفرنس کا آغاز

راولپنڈی (اُردو پوائنٹ اخبارتازہ ترین - اے پی پی۔ 16 اگست2022ء) فاطمہ جناح ویمن یونیورسٹی میں امریکی حکومت کی طرف سے فنڈڈ پروجیکٹ کے تحت تحقیقی طریقوں پر تین روزہ فیکلٹی ڈویلپمنٹ انٹرنیشنل کانفرنس کا انعقاد 16 سے 18 اگست تک کیا گیا ہے۔کانفرنس کا انعقاد امریکی حکومت کے تعاون سے ایک منصوبے کے تحت کیا گیا جس کا عنوان ''پاکستانی خواتین یونیورسٹیوں میں سماجی علوم کے ساتھ اشتراکی شراکت داری کے ذریعے تدریسی اور تحقیقی صلاحیت کو مضبوط بنانا'' ہے ، کانفرنس کا مقصد یونیورسٹی کے اساتذہ کی تدریسی اور تحقیقی صلاحیتوں کو بڑھانا ہے۔

ملکی اور غیر ملکی سکالرز بھی کانفرنس میں شرکت کریں گے۔امریکی حکومت نے پاکستانی یونیورسٹیوں کی تدریسی اور تحقیقی صلاحیتوں کو بڑھانے میں ہمیشہ سے ہی اہم کردار ادا کیا ہے۔

(جاری ہے)

حالیہ اقدام کا بنیادی مقصد صوبہ پنجاب میں خواتین کو بااختیار بنانا اور انہیں بہتر تعلیمی ماحول اور معیاری تعلیم فراہم کرکے معاشرے میں ان کے بڑھتے ہوئے کردار کو یقینی بنانا ہے۔

فاطمہ جناح ویمن یونیورسٹی ستمبر 2021 کے اوائل میں پاکستان کے یو ایس پاکستان یونیورسٹی پارٹنرشپس گرانٹس پروگرام کے لیے امریکی مشن کے لیے فنڈنگ حاصل کرنے میں کامیاب رہی۔ یونیورسٹی پارٹنرشپ پروگرام کے ذریعے امریکی یونیورسٹیوں نے پاکستان کی یونیورسٹیوں کے ساتھ 20 شراکتیں قائم کیں جس کے تحت پاکستانی یونیورسٹیوں نے تین سالہ دوطرفہ معاہدے کے مطابق امریکی حکومت سے رقم وصول کی۔

شراکتی پروگرام بنیادی طور پر اساتذہ کے لیے پیشہ ورانہ ترقی، فیکلٹی کی تدریسی صلاحیتوں میں اضافہ، مشاورتی خدمات، وسائل کی ترقی اور مختلف شعبوں میں نصاب کی ترقی پر توجہ مرکوز کرتا ہے۔فاطمہ جناح ویمن یونیورسٹی کا شمار پاکستان کی پہلی خواتین یونیورسٹی کے طور پر کیا جاتا ہے اور طالبات ملک بھر سے بلوچستان، جنوبی پنجاب، گلگت بلتستان، خیبرپختونخوا اور سندھ سے تعلیم کے معیار تک رسائی حاصل کرنے آتی ہیں۔ یہ پروگرام مہارت کی ترقی کے شعبے پر توجہ مرکوز کرکے، کمیونیکیشن اور میڈیا سٹڈیز، سوشیالوجی اور دیگر سائنس کے شعبوں کے نصاب کی ترقی میں مدد فراہم کرکے تعلیم کے معیار کو بلند کرنے میں مدد کرے گا۔