عمران خان کے نیانیے کیساتھ ہیں ‘تحریکِ انصاف کے اراکین پنجاب اسمبلی نے پارٹی چھوڑنے کی تردید کر دی

پارٹی چھوڑنے کا بالکل نہیں سوچ رہے، ہم تحریک انصاف کے ساتھ ہیں‘عون حمید ڈوگر ،عبدالحئی دستی ،علمدار عباس قریشی

جمعہ 28 اکتوبر 2022 21:32

لاہور (اُردو پوائنٹ اخبارتازہ ترین - این این آئی۔ 28 اکتوبر2022ء) پاکستان تحریکِ انصاف کے اراکین پنجاب اسمبلی نے خرم لغاری کے پارٹی چھوڑنے سے متعلق بیان کی تردید کر دی ۔ تحریک انصاف کے رکن پنجاب اسمبلی منصور احمد خان نے اپنے بیان میں کہا کہ پارٹی چھوڑنے سے متعلق ایم پی اے خرم لغاری کے بیان کی بھر پور مذمت کرتا ہوں، عمران خان اور اپنی جماعت پی ٹی آئی کے ساتھ ہوں۔

رکن اسمبلی عون حمید ڈوگر نے کہا کہ مظفرگڑھ سے ایسا کوئی بھی بندہ نہیں جو پارٹی چھوڑنا چاہتا ہو، ہم لانگ مارچ میں بھر پور حصہ لیں گے۔اسی طرح پی ٹی آئی کے ایم پی اے عبدالحئی دستی کا کہنا ہے کہ خرم لغاری کے بیان کی تردید کرتا ہوں، ہم عمران خان کے بیانیے کے ساتھ ہیں، ہم پارٹی چھوڑنے کا بالکل نہیں سوچ رہے، ہم تحریک انصاف کے ساتھ ہیں۔

(جاری ہے)

عبدالحئی دستی کا کہنا ہے کہ ہم لانگ مارچ کیحوالے سے مکمل تیاری میں ہیں۔دوسری جانب پی ٹی آئی کے ایم پی اے علمدار عباس قریشی نے بھی خرم لغاری کے بیان پر ردِ عمل دیا ہے۔ ایم پی اے علمدار عباس قریشی نے کہا ہے کہ خرم لغاری کے بیان کی مذمت کرتا ہوں، میں پی ٹی آئی کے ساتھ تھا، ہوں اور رہوں گا، ہم تو لانگ مارچ میں شرکت کے لیے جا رہے ہیں۔یاد رہے کہ رہنما پی ٹی آئی خرم لغاری نے دعویٰ کیا تھا کہ ان کے ساتھ مزید 5 ارکانِ پنجاب اسمبلی نے بھی تحریکِ انصاف چھوڑنے کا فیصلہ کیا ہے۔خرم لغاری نے گفتگو کے دوران کہا تھا کہ ہمیں دکھایا کچھ اور گیا تھا، ہوا کچھ اور ہے، ممکن ہے ہم اسمبلی سے بھی استعفیٰ دے دیں۔