امریکہ ،چالان سے بچنے کیلئے تعارف کرانا پولیس چیف کو مہنگا پڑگیا

ویڈیوسامنے آنے پر پولیس چیف نے معافی مانگی لیکن پھر عہدے سے استعفیٰ دینا پڑگیا

بدھ 7 دسمبر 2022 12:23

فلوریڈا(اُردو پوائنٹ اخبارتازہ ترین - این این آئی۔ 07 دسمبر2022ء) امریکا میں قانون کسی کو نہیں جانتا اور چالان سے بچنے کیلئے ٹریفک پولیس اہلکار کو تعارف کرانا امریکی شہر ٹامپا کی پولیس چیف میری اوکنور کو مہنگا پڑگیا۔امریکی ریاست فلوریڈا کے شہر ٹامپا میں شہر کی پولیس چیف کو شوہر کے ہمراہ گالف گاڑی میں جانے پر ٹریفک پولیس اہلکار نے روکا۔

ٹریفک پولیس اہلکار نے نمبر پلیٹ اور لائسنس نہ ہونے پر انہیں روکا تھا جس پر انہوں نیاپنا تعارف کراتے ہوئے بیج لہرایا اور کہا کہ امید ہے وہ جانے دیں گے۔

(جاری ہے)

یہ منظر اہلکار کے لباس میں موجود کیمرے میں فلمبند ہوگیا۔واقعے کی ویڈیو سامنے آنے کے بعد گزشتہ ہفتے خاتون پولیس چیف نے اپنے طرز عمل پر معافی مانگی تھی لیکن اب انہیں اپنے عہدے سے استعفیٰ دینا پڑگیا ہے۔رپورٹس کے مطابق ٹامپا پولیس چیف نے گزشتہ روز ادارہ جاتی تحقیقات کے بعد عہدہ سے چھوڑ دیا ہے اور اس کا اعلان ٹامپا شہر کے میئر جان کیسٹر نے کیا۔اس معاملے پر ٹامپا کے میئر کا کہنا تھاکہ پولیس چیف نے اخلاقیات کے اصولوں کو توڑا اور انہوں نے اپنی پوزیشن یا شناخت کے غلط استعمال سے متعلق پالیسیوں کی خلاف ورزی کی۔