سعودی عرب میں آئندہ ہفتے کے آخر تک موسم غیر مستحکم رہنے کا امکان

پیر 6 مارچ 2023 12:51

ریاض (اُردو پوائنٹ اخبارتازہ ترین - اے پی پی۔ 06 مارچ2023ء) سعودی عرب کے بیشتر علاقوں میں آئندہ ہفتے کے آخر تک موسم غیر مستحکم رہنے کا امکان ہے۔ سعودی خبر رساں ادارے کے مطابق سعودی عرب میں موسمیات کے قومی مرکز نے گزشتہ روز بیان میں بتایا کہ اس دوران گرد آلود ہوائیں چلیں گی۔ مختلف مقامات پر بارش کا امکان ہے جبکہ درجہ جرارت کئی علاقوں میں مختلف رہے گا۔

(جاری ہے)

قومی مرکز کی رپورٹ کے مطابق گزشتہ روز جازان، عسیر، باحہ مکہ اور مدینہ میں مختلف مقامات پر گرد آلود ہواوں کی وجہ سے حد نگاہ محدود رہی۔ قصیم اور حائل کے کئی علاقے بھی اس زد میں رہے۔ یاد رہے کہ مکہ مکرمہ گورنریٹ کے کرائسز اینڈ منیجمنٹ سینٹر نے مقامی شہریوں اور مقیم غیر ملکیوں کو خبر دار کیا تھا کہ’ غیرمستحکم موسم کے پیش نظر احتیاطی تدابیر اختیار کریں۔ آئندہ ایام کے دوران سیلابی صورتحال کا خدشہ ہے۔ ان نشیبی علاقوں کے قریب جانے سے گریز کیا جائے جہاں پانی بھر جانے کی وجہ سے خطرات ہیں۔