مریم نواز، رانا ثنا اللہ اور اعظم نذیر تارڑ کیخلاف توہین عدالت کی درخواست خارج

ہائیکورٹ نے محفوظ فیصلہ سناتے ہوئے مریم نواز و دیگر کے خلاف دائر درخواست ناقابل سماعت قرار دیدی

پیر 6 مارچ 2023 17:45

لاہور (اُردو پوائنٹ اخبارتازہ ترین - این این آئی۔ 06 مارچ2023ء) لاہور ہائی کورٹ نے مسلم لیگ (ن) کی سینئر نائب صدر مریم نواز، رانا ثنا اللہ اور اعظم نذیرتارڑ کے خلاف توہین عدالت کی درخواست خارج کر دی ۔جسٹس شجاعت علی خان کے روبرو پاکستان مسلم لیگ (ن) کی چیف آرگنائزر مریم نواز اور دیگر کے خلاف ایڈووکیٹ شاہد رانا کے توسط سے توہین عدالت کی کارروائی کے لیے دائر درخواست کی سماعت ہوئی، جس میں درخواست گزار نے موقف اختیار کیا کہ کوئی بھی معاملہ ہو، میں اسے سنجیدہ لیتا ہوں۔

درخواست گزار کے وکیل نے عدالت میں کہا کہ مریم نواز نے سرگودھا میں تقریر کی اور یہ معاملہ اس عدالت کے دائرہ اختیار میں آتا ہے۔ مریم نواز نے 6 مواقع پر توہین عدالت کی ہے۔ یہ درخواست میں نے اپنی مشہوری کے لیے نہیں کی۔

(جاری ہے)

ہمیں توہین عدالت کے قانون پر عملدرآمد کروانا ہوگا۔ درخواست میں استدعا کی گئی کہ عدالت مریم نواز کو توہین عدالت کا شوکاز نوٹس جاری کرے ۔

بعد ازاں لاہور ہائی کورٹ نے توہین عدالت کی کارروائی کے لیے دائر درخواست پر فیصلہ محفوظ کرلیا تھا، جسے بعد ازاں جاری کردیا گیا۔ فیصلے میں عدالت نے مریم نواز و دیگر کے خلاف توہین عدالت کے لیے دائر درخواست ناقابل سماعت قرار دیتے ہوئے مسترد کردی۔اس کے علاوہ لاہور ہائی کورٹ نے شاہزیب خانزادہ، حامد میر اور انصار عباسی کے خلاف بھی توہین عدالت کی درخواست خارج کر دی ۔

دورانِ سماعت درخواست گزار کے وکیل نے عدالت میں موقف اپنایا کہ عدلیہ کو اسکینڈلائز کرنے والے کے خلاف کارروائی ہونی چاہیے۔درخواست گزار کے وکیل نے موقف اختیار کیا کہ مریم نواز پارلیمانی جمہوریت کی بات کرتی ہیں، انہیں خیال رکھنا چاہیے۔درخواست گزار کے وکیل کا یہ بھی کہنا ہے کہ مریم نواز نے الفاظ کا چناو درست نہیں کیا، عدلیہ کے خلاف مہم چلائی جا رہی ہے۔