ٹرین حادثہ، مودی کا جائے حادثہ کا دورہ،تفصیلات معلوم کیں

بھارتی وزیراعظم کی اسپتالوں میں جا کر زخمیوں کی عیادت ، غفلت کس کی تھی تحقیقات جاری

اتوار 4 جون 2023 15:50

نئی دہلی(اُردو پوائنٹ اخبارتازہ ترین - این این آئی۔ 04 جون2023ء) بھارت میں گزشتہ روز ہونے والا خوفناک ٹرین حادثہ 288 افراد کی جان لے گیا لیکن سوال یہ پیدا ہوتا ہے کہ غفلت کس کی تھی اور حادثے کا ذمہ دار کون ہے میڈیارپورٹس کے مطابق گزشتہ روز بھارتی ریاست اڑیسہ میں دو مسافر ٹرینیں ایک ٹریک پر آکر آپس میں ٹکرا گئیں، حادثے کے بعد مسافر بوگیاں دوسرے ٹریک پر کھڑی مال گاڑی پر چڑھ گئیں، خوفناک تصادم میں 288 افراد ہلاک اور 900 افراد زخمی ہوئے۔

(جاری ہے)

مقامی میڈیا کے مطابق کورومنڈل ایکسپریس کلکتہ سے چنئی جا رہی تھی، واقعے کے بعد ریاست اڑیسہ میں سوگ کا سماں ہے ،حادثہ کیسے پیش آیا اس کی تحقیقات کا آغاز کر دیا گیا ہے۔بھارتی وزیراعظم نریندر مودی نے بھی جائے حادثہ کا دورہ کیا اور حکام سے حادثے کی تفصیلات معلوم کیں، بعد ازاں انہوں نے اسپتالوں میں جا کر زخمیوں کی عیادت بھی کی۔