نادرا کا کراچی میں ایک اور میگا سینٹر کھولنے کا اعلان

یونیورسٹی روڈ پر بننے والے میگا سینٹر کے لیے جگہ 5 ماہ قبل لی گئی تھی

پیر 5 جون 2023 19:23

نادرا کا کراچی میں ایک اور میگا سینٹر کھولنے کا اعلان

کراچی (اُردو پوائنٹ اخبارتازہ ترین - این این آئی۔ 05 جون2023ء) نادرا کا ایک اور میگا سینٹر کھولا جارہا ہے جس کے بعد شناختی دستاویزات کے حصول کے لیے شہریوں کی مشکلات میں کمی آئے گی۔تفصیلات کے مطابق نادرا کے نئے میگا سینٹر کی تیاری جاری ہے، ڈائریکٹر جنرل نادرا کا کہنا ہے کہ کراچی میں 6 سال بعد بننے والا میگا سینٹر آئندہ 2 سے ڈھائی ماہ میں مکمل ہوجائے گا۔

(جاری ہے)

ڈی جی کا کہنا ہے کہ یونیورسٹی روڈ پر بننے والے میگا سینٹر کے لیے جگہ 5 ماہ قبل لی گئی تھی، 4 بار جاری ٹینڈر میں کسی نے دلچسپی نہیں لی تھی، چوتھے ٹینڈر میں کوٹیشنز آگئی ہیں۔انہوں نے کہا کہ ستمبر میں شہر میں 6 سال کے بعد میگا سینٹر کھول دیا جائے گا۔ڈی جی کا کہنا تھا کہ حیدر آباد کے شہریوں کے لیے بھی میگا سینٹر کا قیام آخری مراحل میں ہے، ماہ جولائی میں حیدر آباد لطیف آباد میں میگا سینٹر کھول دیا جائے گا۔انہوں نے کہا کہ سندھ میں 2 نادرا سینٹر میں پاسپورٹ کے لیے کانٹر کھولے جا رہے ہیں، کراچی ملیر اور عمر کوٹ میں نادرا سینٹرز میں پاسپورٹ کانٹرز بنائے گئے ہیں، آنکھوں کے ذریعے شناخت کا نظام ابھی ڈی ایچ اے میگا نادرا آفس میں نصب کیا گیا ہے۔