دبئی میں مقیم پاکستانی کا جشنِ آزادی منانے کا منفرد انداز

24 سال سے دبئی میں بینک منیجر کے طور پر کام کرنے والے خاور اقبال نے زیرسمندر سبز ہلالی پرچم لہرا دیا

ساجد علی منگل 15 اگست 2023 12:46

دبئی میں مقیم پاکستانی کا جشنِ آزادی منانے کا منفرد انداز

دبئی ( اُردو پوائنٹ اخبارتازہ ترین ۔ 15 اگست 2023ء ) متحدہ عرب امارات میں مقیم ایک پاکستانی باشندے نے جشنِ آزادی منانے کا منفرد انداز اپناتے ہوئے زیرسمندر سبز ہلالی پرچم لہرا دیا۔ عرب نیوز کے مطابق متحدہ عرب امارات میں مقیم ایک پاکستانی شہری نے بحیرہ عرب میں پانی کے اندر سبز ہلالی پرچم لہرا کر ملک کے یومِ آزادی کا جشن منایا، کراچی سے تعلق رکھنے والے 43 سالہ خاور اقبال 24 سال سے دبئی میں بینک منیجر کے طور پر کام کر رہے ہیں، وطن عزیز کو خراج تحسین پیش کرتے ہوئے انہوں نے سطح سمندر کے نیچے غوطہ لگایا اور بحیرہ عرب کے پانیوں میں کامیابی سے پاکستانی پرچم لہرایا۔

بتایا جاتا ہے کہ خاور نے گذشتہ سال یوم آزادی کے لیے فلائی بورڈ پر پاکستانی پرچم بلند کیا تھا اور اس سال کچھ الگ کرنے کی چاہ میں قومی پرچم لہرانے کے لیے خاور اقبال 25 فٹ گہرائی تک سمندر کے نیچے پہنچے، جہاں انہوں نے بیک وقت متحدہ عرب امارات اور پاکستان کا پرچم لہرایا، پاکستانی شہری کو اپنی اس کوشش کو کامیاب بنانے کی تیاریوں میں ایک ماہ سے زائد عرصہ لگا۔

(جاری ہے)

اس حوالے سے انہوں نے بتایا کہ ’میں نے پاکستان کو خراج تحسین پیش کرنے کے لیے سمندر کے نیچے اپنے ملک کا جھنڈا لہرانے کا فیصلہ کیا، اور ان تمام شہداء کو بھی سلام پیش کیا جنہوں نے ہمارے آزاد وطن کو محفوظ بنایا، تاہم میں ابتدائی طور پر اس بارے میں تھوڑا فکرمند تھا کیوں کہ یہ ایک ایسی سرگرمی ہے جس کی میں نے پہلے کبھی کوشش نہیں کی تھی، ہمارے تربیتی طریقہ کار میں کلاس روم سیشنز، پانی کی مشقیں، پول ٹریننگ اور گہرے سمندر کی تربیت شامل تھی جس کے نتیجے میں مجھے اپنے مشن میں کامیابی ملی۔