لاہور کے این اے 131 میں دوبارہ گنتی، چیئرمین PTI کی درخواست غیرمثر ہونے پر نمٹا دی گئی

قومی اسمبلی تحلیل ہو چکی ہے، اسمبلی تحلیل کے بعد اس معاملے پر مزید کیا ہو سکتا ہے، اب نئے انتخابات کا انتظار کرنا چاہیے، چیف جسٹس

بدھ 16 اگست 2023 23:33

اسلام آباد (اُردو پوائنٹ اخبارتازہ ترین - این این آئی۔ 16 اگست2023ء) سپریم کورٹ نے حلقہ این اے 131 لاہور میں دوبارہ گنتی کے معاملے پر پاکستان تحریک انصاف کے چیئرمین کی درخواست غیر مثر ہونے پر نمٹا دی۔چیف جسٹس عمر عطا بندیال کی سربراہی میں 2 رکنی بینچ نے سماعت کی۔چیف جسٹس نے وکیل بابر اعوان سے مکالمہ کرتے ہوئے کہا کہ دوبارہ گنتی کی اپیل تو اب غیرموثر ہو چکی۔

وکیل بابر اعوان نے جواب دیا کہ جی سر بالکل غیرموثر ہو چکی ہے، اجازت دیں تو معاملہ پر چیئرمین پی ٹی آئی سے نئی ہدایات لے لوں۔

(جاری ہے)

چیف جسٹس عمر عطا بندیال نے ریمارکس دیتے ہوئے کہا کہ قومی اسمبلی تحلیل ہو چکی ہے، اسمبلی تحلیل کے بعد اس معاملے پر مزید کیا ہو سکتا ہے، اب نئے انتخابات کا انتظار کرنا چاہیے۔چیئرمین پی ٹی آئی کے وکیل نے کہا کہ نئے انتخابات کا تو ہمیں بھی بے صبری سے انتظار ہے۔واضح رہے کہ چیئرمین پی ٹی آئی نے این ای131 میں دوبارہ گنتی کے خلاف اپیل دائر کر رکھی تھی۔لاہور ہائی کورٹ نے سعد رفیق کی درخواست پر این ای131 میں دوبارہ گنتی کا حکم دیا تھا، چیئرمین پی ٹی آئی نے ہائی کورٹ کا فیصلہ سپریم کورٹ میں چیلنج کر رکھا تھا۔