اسرائیل سے تعلقات پر پاکستان اپنا فیصلہ ملکی مفادات میں کریگا،نگراں وزیرِ خارجہ

اسرائیلی وزیر خارجہ ایلی کوہن نے کہا تھا سعودی عرب کے ساتھ 6 سے 7 مسلم ممالک اسرائیل کو تسلیم کریں گے، رپورٹ

اتوار 24 ستمبر 2023 12:35

اسلام آباد (اُردو پوائنٹ اخبارتازہ ترین - این این آئی۔ 24 ستمبر2023ء) نگراں وزیر خارجہ جلیل عباس جیلانی نے کہا ہے کہ اسرائیل سے تعلقات کے معاملے پر پاکستان اپنا فیصلہ ملکی مفادات میں کرے گا۔اسرائیل سے تعلقات قائم کرنے کے معاملے پر نگراں وزیرِ خارجہ جلیل عباس جیلانی نے اپنے بیان میں کہا کہ اسرائیل سے تعلقات کے معاملے پر پاکستان فلسطینی عوام کے مفادات کو مدِ نظر رکھتے ہوئے فیصلہ کرے گا۔

(جاری ہے)

واضح رہے کہ اسرائیلی وزیر خارجہ ایلی کوہن نے کہا تھا کہ سعودی عرب کے ساتھ 6 سے 7 مسلم ممالک اسرائیل کو تسلیم کریں گے۔اپنے بیان میں اسرائیلی وزیرِ خارجہ نے کہا تھا کہ سعودی عرب کے ساتھ امن کا مطلب مسلم دنیا اور یہودیوں کے درمیان امن ہے۔علاوہ ازیں سعودی عرب کے 93 ویں قومی دن پر اسرائیل نے مبارک باد بھی دی ہے۔اسرائیلی وزارتِ خارجہ کی جانب سے جاری کیے گئے بیان میں کہا گیا کہ سعودی عرب کے بادشاہ، حکومت اور عوام کو مخلصانہ مبارک باد اور دعائیں پیش کرتے ہیں۔