عالمی نمائش میں روایتی خریداروں کے علاوہ نئے ممالک سے بھی خریدار شریک ہونگے‘ عثمان اشرف

چین ،امریکہ ، برطانیہ، ہنگری، ترکی سمیت 25ممالک سے خریدار وں نے رجسٹریشن کرائی ہے 4اکتوبر سے شروع ہونے والی ہاتھ سے بنے قالینوں کی عالمی نمائش کے حوالے سے جائزہ اجلاس

اتوار 1 اکتوبر 2023 12:25

لاہور(اُردو پوائنٹ اخبارتازہ ترین - این این آئی۔ 01 اکتوبر2023ء) پاکستان کارپٹ مینو فیکچررز اینڈ ایکسپورٹرز ایسوسی ایشن کے سینئر وائس چیئرمین عثمان اشرف نے کہا ہے کہ ہاتھ سے بنے قالینوں کی 39ویں عالمی نمائش 4سے 6اکتوبر تک لاہور کے مقامی ہوٹل میں منعقد ہو گی جس کیلئے تیاریوں کو حتمی شکل دیدی گئی ہے ،نمائش میں شرکت کیلئے چین ،امریکہ ، برطانیہ، ہنگری، ترکی سمیت 25ممالک سے خریدار وں نے رجسٹریشن کرائی ہے جو انتہائی حوصلہ افزاء ہے ۔

ان خیالات کا اظہار انہوں نے ایسوسی ایشن کے دفتر میں عالمی نمائش کی حتمی تیاریوں کے جائزہ اجلا س سے خطاب کرتے ہوئے کیا ۔ اجلاس میں سینئر مرکزی رہنما عبد اللطیف ملک ،کارپٹ ٹریننگ انسٹی ٹیوٹ کے چیئرپر سن اعجاز الرحمان ، میجر (ر) اختر نذیر،سعید خان سمیت دیگر نے شرکت کی ۔

(جاری ہے)

عثمان اشرف نے بتایا کہ عالمی نمائش کا افتتاح چیف ایگزیکٹو آفیسر ٹریڈ ڈویلپمنٹ اتھارٹی پاکستان محمد زبیر موتی والا کریں گے جبکہ پہلے روز گورنر ہائوس میں مینو فیکچررز ، برآمد کنندگان اور غیر ملکی خریداروں میں انعامات تقسیم کرنے کی تقریب کا انعقاد اور غیر ملکی خریداروں کے اعزاز میں عشائیہ بھی دیا جائے گا جس کی میزبانی گورنر پنجاب پنجاب محمد بلیغ الرحمن کریں گے ۔

انہوں نے کہا کہ قوی امید ہے کہ لاہور میں منعقد ہونے والی عالمی نمائش میں غیر ملکی خریداروں کی جانب سے وسیع پیمانے پر معاہدے کئے جائیں گے جس سے ہماری صنعت کو تقویت ملے گی ۔نمائش میں غیر ملکی خریداروں اور پاکستان کے برآمد کنندگان کے درمیان بزنس ٹو بزنس ملاقاتیں بھی ہوں گی جس سے دو طرفہ روابط کو مضبوط بنانے میں مدد ملے گی ۔ انہوں نے کہا کہ امسال نمائش میں نئے ممالک سے بھی خریدار شریک ہو رہے ہیں جن سے موثر رابطے بڑھائے جائیں تاکہ ہمیں نئی منڈیوں تک رسائی حاصل ہو۔

انہوں نے کہا کہ پاکستان کارپٹ ایسوسی ایشن غیر ملکی خریداروں کو راغب کرنے کیلئے اپنے طور پر ہر ممکن اقدامات اٹھا رہی ہے،ٹریڈ ڈویلپمنٹ اتھارٹی پاکستان نے نمائش کی کامیابی کیلئے اپنا بھرپور تعاون فراہم کیا ہے جس پر بے حد شکر گزار ہیں ۔ انہوں نے کہا کہ ہاتھ سے بنے قالینوں کی پاکستان میں عالمی نمائش ایک بڑا ایونٹ ہے جسے ہم نے ہر صورت کامیاب بنانا ہے اس کے لئے ضروری ہے کہ ہر شخص اپنا انفرادی اور اجتماعی کردار ادا کرے ۔انہوں نے کہا کہ نمائش میں سٹالز لگانے والوں کو واضح ہدایات دی گئی ہیں کہ وہ معیاری اور دیدہ زیب ڈیزائنوں سے مزین مصنوعات ڈسپلے کریں تاکہ غیر ملکی خریدار پاکستانی برآمد کنندگان سے معاہدے کرنے کو ترجیح دیں گے۔