انتخابی سرگرمیوں میں اقلیتوں کے فعال کردار سے جمہوری کلچر مزید مضبوط ہو گا، مریم نواز

منگل 28 نومبر 2023 22:37

لاہور (اُردو پوائنٹ اخبارتازہ ترین - اے پی پی۔ 28 نومبر2023ء) پاکستان مسلم لیگ (ن) کی سینئر نائب صدر و چیف آرگنائزر مریم نواز نے کہا ہے کہ 2024پاکستان اور عوام کے لئے نئی امیداور ترقی کا نیا دور لے کر آ رہا ہے، پارٹی قائد نواز شریف چاہتے ہیں نوجوان عام انتخابات میں سیاسی سرگرمیوں کا ہراول دستہ بنیں، انتخابی سرگرمیوں میں اقلیتوں کے فعال کردار سے جمہوری کلچر مزید مضبوط ہو گا۔

ان خیالات کا اظہار انہوں نے مسلم سٹوڈنٹس فیڈریشن اور منیارٹی ونگ کے عہدیداروں اور کارکنوں کے اجلاس سے خطاب کرتے ہوئے کیا ۔ اجلاس میں 8فروری کے عام انتخابات کے حوالے سے ایم ایس ایف اور منیارٹی ونگ کی کارکردگی کا جائزہ لیا گیا اوران کی کارکردگی پر اطمینان کا اظہار کیا گیا ۔اجلاس میں عام انتخابات میں نوجوانوں اور مینارٹی ونگ کی بھرپور شرکت اور شمولیت کو یقینی بنانے کی تاکید کی گئی ۔

(جاری ہے)

اجلاس میں ملک بھر میں انتخابی سرگرمیاں تیز کرنے کا فیصلہ بھی کیا گیا ۔ وفاق سمیت چاروں صوبوں، گلگت بلتستان اور آزاد جموں و کشمیر میں نوجوانوں کو متحرک کیا جائے گا۔مریم نواز نے کہا کہ نوجوانوں اور اقلیتوں کو سیاست کی اولین صفوں میں لانا چاہتے ہیں، ان کے کردار میں بتدریج اضافہ کریں گے، نوجوان ملک کا سرمایہ ہیں، نوجوانوں کی ترقی ملک کی ترقی ہے، ایم ایس ایف کے پلیٹ فارم سے ملک بھر سے نوجوانوں کو عملی سیاسی میں شمولیت کا موقع ملے گا۔

ا نہوں نے کہاکہ2024پاکستان اور عوام کے لئے نئی امید، ترقی کا نیا دور لے کر آ رہا ہے، نوازشریف کی قیادت میں نئے سال سے پاکستان کی معاشی ترقی کا تیز رفتار دور شروع ہوگا۔ایم ایس ایف اور منیارٹی ونگ نے سیاسی مواقع بڑھانے اور پارٹی سرپرستی پر مریم نواز شریف کا شکریہ ادا کیا ۔ شرکا نے کہا کہ پارٹی کے اعتماد پر پورا اتریں گے، پاکستان کی ترقی کے مشن میں قائد نواز شریف کے سپاہی بن کر کام کریں گے۔