مصالحتی مرکز میں مسائل کے حل کیلئے مائنڈ سیٹ کی تبدیلی ضروری ہے،چیف جسٹس عامر فاروق

منگل 28 نومبر 2023 22:56

اسلام آباد (اُردو پوائنٹ اخبارتازہ ترین - این این آئی۔ 28 نومبر2023ء) اسلام آباد ہائی کورٹ کے چیف جسٹس عامر فاروق نے کہا ہے کہ مصالحتی مرکز میں مسائل کے حل کیلئے مائنڈ سیٹ کی تبدیلی ضروری ہے۔مصالحتی مرکز کی افتتاحی تقریب سے خطاب کرتے ہوئے کہا کہ مصالحتی مراکز میں مسائل کو حل کرانے کے لئے مائنڈ سیٹ کو تبدیل کرنے کی ضرورت ہے۔

(جاری ہے)

چیف جسٹس اسلام آباد ہائیکورٹ نے کہا کہ ہم اب اس طرف بڑھ رہے ہیں کہ ججز، وکلا اور پبلک کا مائنڈ سیٹ تبدیل ہو، عام تاثر ہے کہ مصالحتی مرکز کے بعد وکلاء کی پریکٹس متاثر ہو گی، ایسا ہرگز نہیں، مصالحتی مرکز میں کیسز طے ہونے سے پبلک کو فائدہ ہو گا، یہ کم خرچ اور کم وقت طلب ہے۔

چیف جسٹس عامر فاروق نے کہا کہ اگر مصالحتی مرکز میں مسئلہ حل نہیں ہوتا تو اس کے بعد عدالتیں تو بہرحال موجود ہیں، اسلام آباد ہائی کورٹ میں 18 ہزار اور ضلعی عدلیہ میں 50 ہزار کیسز زیر التواء ہیں، مصالحتی مرکز کے بعد عدالتوں پر کیسز کا بوجھ کم کرنے میں مدد ملے گی۔