اسلام آباد ہائیکورٹ میں العزیزیہ اور ایون فیلڈ ریفرنسز کی اپیلوں میں اہم پیشرفت

نوازشریف اور نیب کی تمام اپیلیں کل سماعت کیلئے مقرر،چیف جسٹس عامر فاروق ، جسٹس میاں گل حسن اورنگزیب اپیلوں پرسماعت کریں گے

ثنااللہ ناگرہ منگل 28 نومبر 2023 19:29

اسلام آباد ہائیکورٹ میں العزیزیہ اور ایون فیلڈ ریفرنسز کی اپیلوں میں ..

اسلام اآباد (اردوپوائنٹ اخبارتازہ ترین ۔ 28 نومبر 2023ء) اسلام آباد ہائیکورٹ میں العزیزیہ اور ایون فیلڈ ریفرنسز میں سابق وزیراعظم نوازشریف اور نیب کی تمام اپیلیں کل سماعت کیلئے مقرر کردی گئیں۔ تفصیلات کے مطابق اسلام آباد ہائیکورٹ میں العزیزیہ اور ایون فیلڈ ریفرنسز کی اپیلوں میں اہم پیشرفت ہوئی ہے ، قائد مسلم لیگ ن نوازشریف اور نیب کی تمام اپیلیں کل سماعت کیلئے مقرر کردی گئیں، العزیزیہ ریفرنس اور ایون فیلڈ ریفرنس کی اپیل سماعت کیلئے مقرر ہوئی، نیب کی فلیگ شپ ریفرنس بریت کے خلاف اپیل سماعت کیلئے مقرر کردی گئی۔

نیب کی العزیزیہ ریفرنس میں سزا بڑھانے کی اپیل بھی سماعت کیلئے مقرر کردی گئی ہے۔اپیلوں پر اسلام ہائیکورٹ کے چیف جسٹس عامر فاروق ، جسٹس میاں گل حسن اورنگزیب سماعت کریں گے۔

(جاری ہے)

دوسری جانب بتایا گیا ہے کہ سابق وزیرِ اعظم نواز شریف کی کل29 نومبر کو اسلام آباد ہائیکورٹ میں پیشی سے قبل سیکیورٹی انتظامات کے حوالے سے رجسٹرار آفس نے قواعد و ضوابط سے متعلق سرکلر بھی جاری کر دیا گیا ہے۔

ایون فیلڈ اور العزیزیہ ریفرنسز میں سزا کے خلاف چیف جسٹس عامر فاروق اور جسٹس گل حسن اورنگزیب 29 نومبر کو اپیلوں پر سماعت کریں گے ۔سرکلر کے متن کے مطابق آئی جی اسلام آباد نواز شریف کی پیشی پر مناسب سیکیورٹی انتظامات یقینی بنائیں، کمرہ عدالت نمبر ایک میں داخلہ رجسٹرار آفس کے جاری پاسز سے مشروط ہو گا۔رجسٹرار آفس نے سرکلر میں کہا کہ درخواست گزار کی قانونی ٹیم اور 25 رہنماؤں کو کمرہ عدالت داخلے کی اجازت ہو گی جبکہ اٹارنی جنرل، ایڈووکیٹ جنرل کے 5، 5 سرکاری وکلاء کو کمرہ عدالت داخلہ کی اجازت ہو گی۔

سرکلر میں کہا گیا کہ اسلام آباد ہائیکورٹ جرنلسٹ ایسوسی ایشن کے 15 صحافیوں کو کمرہ عدالت داخلے کی اجازت ہو گی جبکہ عدالت کے ملازمین ان انٹری پاسز سے مستثنیٰ ہوں گے۔