عالمی برادری کھلے دل کے ساتھ فلسطینی عوام کے ساتھ یکجہتی کا اظہار کرے،راجہ پرویزاشرف

بدھ 29 نومبر 2023 22:21

اسلام آباد (اُردو پوائنٹ اخبارتازہ ترین - آن لائن۔ 29 نومبر2023ء) اسپیکر قومی اسمبلی راجہ پرویز اشرف نے فلسطینی عوام کی سیاسی، سفارتی اور اخلاقی حمایت جاری رکھنے کے پاکستان کے اصولی موقف کا اعادہ کی کرتے ہوئے کہا ہے کہ مسئلہ فلسطین کا حل 1967 سے پہلے کی سرحدوں کے مطابق آزاد فلسطینی ریاست کے قیام اور القدس کو اس کا دارالحکومت قرار دینے میں مضمر ہے۔

فلسطین کے عالمی دن کے موقع پر اپنے پیغام میں اسپیکر اسمبلی نے کہا کہ پاکستانی عوام اور پارلیمان اپنے فلسطینی بھائیوں کے ساتھ مکمل اظہار یکجہتی کا اظہار کرتی ہیں۔ وقت کا تقاضہ ہے کہ عالمی برادری کھلے دل کے ساتھ فلسطینی عوام کے ساتھ یکجہتی کا اظہار کرے۔ انہوں نے کہا اسرائیلی قابض افواج کی جانب سے فلسطینی بچوں،خواتین اور معصوم شہریوں کا قتل عام شرمناک اور قابل مذمت ہے۔

(جاری ہے)

انہوں نے کہا دنیا میں پائیدار امن کے قیام کیلئے مسئلہ فلسطین و کشمیر سمیت تمام تنازعات کا منصفانہ حل ضروری ہے۔ انہوں نے کہا فلسطین میں جاری نسل کشی اور جبری نقل مکانی کو روکنے کیلئے عملی اقدامات اٹھانے کی ضرورت ہے۔ انہوں نے کہا فلسطین کی موجودہ صورت حال پر عالمی برادری کی خاموشی لمحہ فکریہ ہے ، انہوں نے کہا مسئلہ فلسطین کا حل 1967 سے پہلے کی سرحدوں کے مطابق آزاد فلسطینی ریاست کے قیام اور یروشلم کو اس کا دارالحکومت قرار دینے میں ہی مضمر ہے۔

انہوں نے کہا اقوام متحدہ فلسطین میں انسانی حقوق کی پامالیوں کے خاتمے کیلئے کردار ادا کرے ۔ اسرائیلی مظالم فلسطینی عوام کے حق خودارادیت کی تحریک کو دبا نہیں سکتے۔ انہوں نے فلسطینی عوام کی سیاسی، سفارتی اور اخلاقی حمایت جاری رکھنے کے پاکستان کے اصولی موقف کا بھی اعادہ کیا ۔