اللہ تعالی نے نوازشریف کو ہر الزام سے بری کیا، عدلیہ کا شکریہ جس نے انصاف دیا، شہباز شریف کا اظہار تشکر

بدھ 29 نومبر 2023 23:21

لاہور (اُردو پوائنٹ اخبارتازہ ترین - این این آئی۔ 29 نومبر2023ء) سابق وزیراعظم وپاکستان مسلم لیگ (ن) کے صدر شہباز شریف نے کہا ہے کہ عدلیہ کا شکریہ جس نے انصاف دیا،نواز شریف کے اللہ تعالی پر کامل بھروسے ،ثابت قدمی سے سیاسی انتقام لینے والوں کے پائوں اکھڑ گئے۔شہباز شریف نے ایون فیلڈ ریفرنس میں پارٹی قائد محمد نواز شریف کی بریت پر اظہار تشکر کرتے ہوئے کہا کہ اللہ تعالی کا شکر ہے جس نے یہ دن دکھایا، میرے قائد، بڑے بھائی، پارٹی اور خاندان کو سرخرو فرمایا ،بے گناہ محمد نواز شریف نے معاملہ اللہ تعالی پر چھوڑا تھا، اللہ تعالی نے نوازشریف کو ہر الزام سے بری کیا، الحمدللہ ، قوم کو قائد محمد نواز شریف کی بریت مبارک ہو ۔

انہوں نے کہا کہ قید خانے، زنداں، بے بنیاد مقدمات، چادر اور چار دیواری کی پامالی، کردار کشی سمیت اذیت کا ہر حربہ اختیار کیاگیا لیکن اللہ تعالی نے سچائی واضح کر دی، الحمدللہ، اپنے قائد محمد نواز شریف کو دل کی گہرائیوں سے مبارک پیش کرتا ہوں ، بیٹی مریم نواز شریف کو مبارک دیتا ہوں جس نے ہمت، صبر اور بے مثال جرات و بہادری سے حالات کے جبر کا مقابلہ کیا ۔

(جاری ہے)

شہباز شریف نے کہا کہ پارٹی قائدین اور کارکنوں کو مبارک دیتا ہوں جنہیں ہمیشہ اپنے قائد کی بے گناہی کا یقین تھا، پارٹی قائدین اور کارکنوں نے جس بہادری سے اپنے قائد کا ساتھ دیا، اس پر انہیں سلام پیش کرتا ہوں ، اپنے بہادر قائد کو سلام پیش کرتا ہوں جنہوں نے زندگی کے تلخ ترین لمحوں میں بھی کبھی ہمت نہیں ہاری ، قائد نواز شریف کے اللہ تعالی پر کامل بھروسے اور ثابت قدمی سے سیاسی انتقام لینے والوں کے پائوں اکھڑ گئے، عدلیہ کا شکریہ جس نے انصاف دیا۔