Live Updates

بیرسٹر گوہر خان چیف الیکشن کمشنر پی ٹی آئی کے عہدے سے مستعفی ہوگئے

نیازاللہ نیازی کو پارٹی کے نئے چیف الیکشن کمشنر مقرر ، نیاز اللہ نیازی پی ٹی آئی کے انٹرا پارٹی الیکشن کروائیں گے

ثنااللہ ناگرہ جمعرات 30 نومبر 2023 19:16

بیرسٹر گوہر خان چیف الیکشن کمشنر پی ٹی آئی کے عہدے سے مستعفی ہوگئے

اسلام آباد (اردوپوائنٹ اخبارتازہ ترین ۔ 30 نومبر 2023ء) چیئرمین پی ٹی آئی عمران خا ن نے بیرسٹر گوہر خان کی پارٹی چیئرمین کی نامزدگی کے بعد پارٹی کا نیا الیکشن کمشنر مقرر کردیا ہے۔ تفصیلات کے مطابق بیرسٹر گوہر خان تحریک انصاف کے چیف الیکشن کمشنر کے عہدے سے مستعفی ہوگئے، چیئرمین پی ٹی آئی نے نیاز اللہ نیازی کو پارٹی کا نیا چیف الیکشن کمشنر مقرر کردیا ہے، نیاز اللہ نیازی بطور چیف الیکشن کمشنر پی ٹی آئی کے انٹرا پارٹی الیکشن کروائیں گے۔

بتایا گیا ہے کہ نیاز اللہ نیازی چیئرمین پی ٹی آئی عمران خان کے دیرینہ ساتھی ہیں، وہ پہلے بھی انٹرا پارٹی الیکشن کروا چکے ہیں۔نیاز اللہ نیازی نے بھی پارٹی کا نیا چیف الیکشن کمشنر مقرر ہونے کی تصدیق کردی ہے۔ دوسری جانب جنگ اخبار کے مطابق چیئرمین پی ٹی آئی کو جب الیکشن کمیشن کے فیصلے سے آگاہ کیا گیا تو عمران خان نے کہا میں الیکشن کمیشن کو کوئی بہانہ نہیں دینا چاہتا کہ وہ عام انتخابات میں پی ٹی آئی سے بلے کا نشان لے یا پی ٹی آئی کو الیکشن میں حصہ نہ لینے دے، اس لیے پی ٹی آئی کو بند گلی سے نکالنے اور اسٹیبلشمنٹ سے بہتر رابطہ کاری کیلئے راستہ بنانے کے مقصد کے لیے بیرسٹر گوہر کو آگے لایا گیا ہے، تاہم بیرسٹر گوہر کی تعیناتی کے فیصلے سے پی ٹی آئی کے اندر عمران خان مخالف حلقے کو مایوسی ہوئی۔

(جاری ہے)

بتایا گیا ہے کہ عمران خان جو جیل میں اپنا بیشتر وقت قانونی تنازعات سے خوش اسلوبی سے نمٹنے کی سوچ میں گزارتے ہیں اور سخت گیر موقف کے منفی اثرات کو زائل کرنے کیلئے پارٹی کے اندر ایک تبدیلی لائی گئی، کیئر ٹیکر چیئرمین کو وہ تمام اختیارات حاصل ہوں گے جو پارٹی دستور نے چیئرمین کو دیئے ہیں تاہم یہ بات طے ہے کہ پارٹی دستور میں کیئر ٹیکر چیئرمین لانے کی گنجائش نہیں پارٹی آئین میں نگران عہدیدارکا کوئی ذکر نہیں ہے، ان حالات میں چیئرمین پی ٹی آئی کی تبدیلی ایک سمارٹ موو ہے جس کا تعلق الیکشن سے ہے اور جس کا مقصد الیکشن میں پی ٹی آئی کیلئے راستہ بنانا ہے۔

پاکستان تحریک انصاف کے مرکزی سیکرٹری اطلاعات رؤف حسن کا کہنا ہے کہ ہم الیکشن کمیشن کے آرڈر پر عمل کر رہے ہیں اور انٹرا پارٹی الیکشن کر ا رہے ہیں، انٹرا پارٹی الیکشن میں بیرسٹر علی گوہر چیئرمین کے امید وار ہوں گے، چیئرمین کے ساتھ دیگر عہدیدار بھی منتخب ہوں گے کیوں کہ ہم نے فیصلہ کر لیا ہے کہ پی ٹی آئی اعم انتخابات ضرور لڑے گی اور ہم بلے کے نشان پر حصہ لیں گے۔ انہوں نے کہا کہ پارٹی میں ہارڈ کور اور سافٹ فیس کا کوئی نظریہ نہیں ہے، عمران خان پارٹی چیئرمین تھے اور تاحیات چیئرمین رہیں گے لیکن ہمیں الیکشن میں جانا ہے، جس کیلئے قانونی تقاضے پورے کر رہے ہیں۔