یونیورسٹی آف سیالکوٹ میں یوم اقبال منانے کیلئے تقریبات کا اہتمام

ہفتہ 2 دسمبر 2023 18:22

سیالکوٹ (اُردو پوائنٹ اخبارتازہ ترین - اے پی پی۔ 02 دسمبر2023ء) یونیورسٹی آف سیالکوٹ میں یوم اقبال کو منانے کے لیے مختلف تقریبات کا اہتمام کیا گیا۔ ان تقریبات کا اہتمام اقبال چیئر اور سنٹر فار رومی اینڈ اقبال اسٹڈیز کے زیر انتظام کیا گیا۔ اپنی روایات کو برقرار رکھتے ہوئے یونیورسٹی آف سیالکوٹ نے شاعر مشرق کی فکر کو عام کرنے کے لیے وائس چانسلر محمد ریحان یونس اور چیئرمین بورڈ آف گورنرز فیصل منظور کی زیر سر پرستی اقبال چیئر اور سنٹر فار رومی اینڈ اقبال اسٹڈیز کے زیر انتظام یوم اقبال کو منانے کے لیے مختلف تقریبات کا اہتمام کیا جس میں اقبال اکادمی کے تعاون سے ایک سیمینار بعنوان "فکر اقبال میں اسلامی ریاست کا تصور" منعقد ہوا، اس سیمینار کے مہمان خصوصی منیب اقبال اور ڈاکٹر عبدالروف رفیقی ڈائریکٹر اقبال اکادمی پاکستان تھے۔

(جاری ہے)

اس سیمینار میں منیب اقبال اور ڈاکٹر عبدالروف رفیقی، رجسٹرار محمد یعقوب، ڈاکٹر نوید جمیل ملک، ڈاکٹر مشتاق عادل، ڈاکٹر یاسمین کوثر، ڈاکٹر عامر اقبال نے فکر اقبال کے عصری پس منظر میں خیالات کا اظہار کیا۔ آل پاکستان جامعات اور کالجز کے مابین مقابلہ جات، کلام اقبال کے نتائج کا اعلان بھی کیا گیا اور تقسیم انعامات کی تقریب منعقد ہوئی۔

نظامت کے فرائض ڈاکٹر یاسمین کوثر اور حماد نے ادا کیے۔ ان مقابلوں میں مختلف جامعات اور کالجز کے طلبا و طالبات نے بھی حصہ لیا جن میں پنجاب یونیورسٹی، گورنمنٹ کالج یونیورسٹی لاہور، جی سی ویمن یونیورسٹی سیالکوٹ، ایجوکیشن یونیورسٹی لاہور اور خوشاب، یونیورسٹی آف سیالکوٹ، گورنمنٹ پوسٹ گریجوایٹ اسلامیہ کالج کوپر روڈ لاہور، گورنمنٹ ڈگری کالج وحدت کالونی لاہور، گورنمنٹ ڈگری کالج فار گرلز سیالکوٹ، وائٹل کالج ڈسکہ، جامعہ المصطفیٰ گوجرانوالہ اور ان جیسے دیگر اداروں سے طلبا و طالبات اور اساتذہ کرام نے حصہ لیا۔ ان مقابلہ جات میں تقریری مقابلہ، بیت بازی، کلام اقبال تحت الفظ، ترنم،خطاطی، مصوری اور اسکیچنگ شامل تھے۔