پی ٹی آئی کے انٹرا پارٹی انتخابات مسترد ، الیکشن کمیشن نتائج کالعدم قرار دیکر کارروائی کرے‘فردوس عاشق اعوان

برائے نام الیکشن ڈکٹیٹر شپ کی بد ترین مثال ،جمہوریت کا درس دینے والوں نے خود ہی پارٹی کے اندر سے جمہوریت کے تاثر کو ختم کر دیا

ہفتہ 2 دسمبر 2023 22:57

پی ٹی آئی کے انٹرا پارٹی انتخابات مسترد ، الیکشن کمیشن نتائج کالعدم ..

لاہور (اُردو پوائنٹ اخبارتازہ ترین - این این آئی۔ 02 دسمبر2023ء) استحکام پاکستان پارٹی کی مرکزی سیکرٹری اطلاعات ڈاکٹر فردوس عاشق اعوان نے پی ٹی آئی کے انٹرا پارٹی انتخابات کو مسترد کرتے ہوئے الیکشن کمیشن سے کارروائی کا مطالبہ کر دیا ۔سیکرٹری اطلاعات ڈاکٹر فردوس عاشق اعوان نے اپنے ردعمل کا اظہار کرتے ہوئے کہا کہ مرشد کے شوہر کی جگہ اب بیرسٹر گوہر چیئرمین پی ٹی آئی کے عہدے پر تعینات ہو گئے ،پراسس کے بغیر بطور چیئرمین ان کی تقرری پارٹی کے منشور اورجمہوری روایات کے برعکس ہے برائے نام انٹرا پارٹی الیکشن ڈکٹیٹر شپ کی بد ترین مثال ہیں جو ناقابل تسلیم ہیں ، ووٹرز اور متبادل امیدواروں کے بغیر یہ الیکشن جمہوریت کی نفی اور جمہوری اقدار سے انکار ہے، جمہوریت کا درس دینے والوں نے آج خود ہی پارٹی کے اندر سے جمہوریت کے تاثر کو ختم کر دیا، مذکورہ انتخابات پارٹی کے آئین سے متصادم ہیں جن کی کوئی آئینی و قانونی حیثیت نہیں۔

(جاری ہے)

آئی پی پی ترجمان نے کہا کہ خواہشات کے تابع الیکشن کے نتائج کسی طرح بھی تسلیم نہیں کئے جا سکتے، امید ہے الیکشن کمیشن ان انتخابات پر فوری نوٹس لیتے ہوئے انہیں کالعدم قرار دے گا، الیکشن کمیشن کو یہ نتائج مسترد کرتے ہوئے پارٹی کے خلاف بھرپور اور موثر کارروائی کرنی چاہئے۔فردوس عاشق اعوان نے مزید کہا کہ جو جماعت اپنے اندر جمہوری روایات قائم نہیں رکھ سکتی وہ ملک میں کیسے جمہوریت لا سکتی، جمہوریت پسند پارٹی کے طور پر استحکام پاکستان پارٹی ان نتائج کو مسترد کرتی ہے۔