لاہور پرائم،سی بی ڈی قائد ڈسٹرکٹ کا جدید انفراسٹرکچر مکمل، نگران وزیراعلی محسن نقوی نے افتتاح کر دیا

لاہور (اُردو پوائنٹ اخبارتازہ ترین - اے پی پی۔ 02 دسمبر2023ء) لاہور پرائم،سی بی ڈی قائد ڈسٹرکٹ کا جدید انفراسٹرکچر مکمل ہوگیا ، نگران وزیراعلی پنجاب محسن نقوی نے لاہور پرائم کا باضابطہ افتتاح کر دیا ہے۔ لاہور پرائم میں کشادہ سڑکیں، بہترین زیر زمین بجلی کا نظام، جدید سیوریج و ڈرینج سسٹم، بلاتعطل پانی کی سپلائی،دلکش ہارٹیکلچراور لینڈ سکیپنگ کی گئی ہے۔

وزیر اعلی پنجاب نے سنٹرل بزنس ڈسٹرکٹ کا دورہ کیا اور مین بلیو وارڈ کا معائنہ کیا۔ محسن نقوی نے سنٹر پوائنٹ گلبرگ سے والٹن روڈ تک زیر تعمیر بلیوارڈ کے پورے روٹ کابھی معائنہ کیااور زیر تعمیر بلیوارڈ پراجیکٹ پر جاری تعمیراتی سرگرمیوں کا جائزہ لیا۔ وزیر اعلی نے پراجیکٹ کو ٹائم لائن کے اندر مکمل کرنے ہدایت کی۔

(جاری ہے)

محسن نقوی نے کلمہ چوک کے قریب بھی لاہور پرائم کا وزٹ کیا اور ٹریفک نظام کو بہتر بنانے کے لئے ہدایات دیں۔

وزیر اعلی نے لاہور پرائم کی افتتاحی تقریب سے خطاب کرتے ہوئے کہا کہ ایسے دور کا آغاز کر دیا ہے جو لاہور کی اسکائی لائن کو تبدیل کر دیگا۔لاہور پرائم سی بی ڈی پنجاب قائد ڈسٹرکٹ کے انفراسٹرکچر کی تکمیل ایک سنگ میل کی حیثیت رکھتی ہے۔ لاہور پرائم کو بین الااقوامی بزنس حب بنائینگے۔ انہوں نے کہا کہ سی بی ڈی نے ایک اور وعدہ پورا کر دیا ہے، سی بی ڈی پرائم ان لوگوں کے لئے ہے جو پہلے سے پلاٹ خرید چکے ہیں، یہ پلاٹس نیلامی کے ذریعے گلبرگ کی نارمل قیمت سے دو گنا قیمت پر فروخت کئے گئے۔

انہوں نے کہا کہ سی بی ڈی کو کریڈٹ جاتا ہے کہ علاقے کو اچھی طرح ڈویلپ کیا جس سے قیمت زیادہ حاصل ہوئی۔ سی بی ڈی کے پاس ابھی بھی کافی زیادہ اراضی موجود اور ہماری کوشش ہے کہ سی بی ڈی کو اضافی اراضی دی جائے۔ ہماری سی بی ڈی کے ساتھ کوشش ہے کہ مین روڈ کو والٹن روڈ اور ڈیفنس روڈ کے ساتھ جلد منسلک کیا جائے۔ جنوری تک یہاں نیا برج مکمل ہورہا ہے تو مین بلیوارڈ، ڈیفنس اور والٹن روڈ کے ساتھ منسلک ہوجائے گا۔

وزیر اعلی نے کہا کہ سی بی ڈی گارڈن ٹائون میں پراجیکٹ ٹیک اپ کررہی ہے۔ گارڈن ٹائون میں ٹریفک کے مسائل حل کرنے کے لئے سی بی ڈی پراجیکٹ شروع کررہی ہے۔ سی بی ڈی کو فیروز پور پر اراضی دی گئی ہے جس پر سی بی ڈی کام کررہی ہے۔ سی بی ڈی راولپنڈی میں زمین کا تعین کرے تاکہ ہم سی بی ڈی راولپنڈی شروع کر سکیں۔ یہ پنجاب حکومت کی وہ زمینیں ہیں جو ضائع ہورہی ہیں، ہم ان زمینوں سے 100گنا زیادہ ریونیو حاصل کرسکتے ہیں۔

سی بی ڈی نے اگلے 2سے3ماہ میں 500 ملین ڈالر کا زرمبادلہ اکٹھا کرنا ہے۔ سی بی ڈی لاہور میں ڈ پلومیٹک انکلیو کی منظوری دی جا چکی جس پر کام جاری ہے۔ انہوں نے کہا کہ ڈپلومیٹک انکلیو بننے سے پوری ڈپلومیٹک کمیونٹی یہاں شفٹ ہوجائے گی۔ سی بی ڈی راولپنڈی کو فوری طور پر شروع کرنا ہے، سی بی ڈی ملتان پر بھی کام شروع کررہے ہیں۔ محسن نقوی نے سٹیٹ آف آرٹ انفراسٹرکچر پر سی بی ڈی کے چیف ایگزیکٹو آفیسر عمران امین اور ان کی ٹیم کو شاباش دی۔

صوبائی وزیر ہائوسنگ اظفرعلی ناصر، چیف سیکرٹری زاہد اختر زمان، سیکرٹری ہائوسنگ،کمشنر لاہور ڈویژن، ڈپٹی کمشنر، چیف آپریٹنگ آفیسر سی بی ڈی، این ایل سی و نیسپاک کی پراجیکٹ ٹیمز، سی بی ڈی میں سرمایہ کاری کرنے والی شخصیات اور سی بی ڈی کے پارٹنرز بھی اس موقع پر موجود تھے۔