Live Updates

عمران نے اپنی کرسی زرداری کے تراشے ہیرے کے حوالے کردی، خواجہ آصف

یہ پی ٹی آئی لیڈرز اور کارکنوں کے لیے ڈوب مرنے کا مقام ہے، سوشل میڈیاپر نئے چیئر مین پی ٹی آئی بیرسٹر گوہرعلی خان کا انتخابی پوسٹرشیئر کر دیا

اتوار 3 دسمبر 2023 18:35

عمران نے اپنی کرسی زرداری کے تراشے ہیرے کے حوالے کردی، خواجہ آصف

اسلام آباد (اُردو پوائنٹ اخبارتازہ ترین - این این آئی۔ 03 دسمبر2023ء) پاکستان مسلم لیگ ( ن)کے رہنما خواجہ آصف نے کہا ہے کہ عمران نے اپنی کرسی زرداری کے تراشے ہیرے کے حوالے کردی، یہ پی ٹی آئی لیڈرز اور کارکنوں کے لیے ڈوب مرنے کا مقام ہے۔

(جاری ہے)

لیگی رہنما نے اپنے ایکس (ٹوئٹر ) اکائونٹ پر پی ٹی آئی کے نومنتخب چیئرمین بیرسٹر گوہرعلی خان کا انتخابی پوسٹر شیئر کیا ہے جب وہ پیپلزپارٹی کی جانب سے قومی اسمبلی کی نشست کے امیدوار تھے، اور لکھا ہے کہ تحریک انصاف کے نئے چئیرمین کی2008-2022تک 14 سال آصف زرداری قائد رہے، وہ 2022 میں PTIمیں آئے۔

خواجہ آصف نے طنز کرتے ہوئے کہا کہ ایک سال کے اندر عمران خان کو زرداری صاحب کا تراشا ہیرا اتنا پسند آیا کہ اپنی کرسی اس کے حوالے کر دی، اور اپنے پرانے ساتھیوں کو کوڑا کرکٹ کر دیا۔لیگی رہنما نے عمران خان کو ہدف تنقید بناتے ہوئے کہا کہ اپنی غیر حاضری میں وہ اپنے پرانے ساتھیوں پہ اعتبار کرنے کو تیار نہیں۔ جس شخص نے ساری عمر لوگوں کو دھوکے دیے ہوں اس کے لیے دوسروں پہ اعتبار مشکل ہو تا ہے۔خواجہ آصف نے اپنے پیغام میں پی ٹی آئی کے لیڈروں اور ورکروں سے کہا ہے کہ یہ ان کے لیے ڈوب مرنے کا مقام ہے۔