کرپشن کے خاتمے کے لیے درس گاہوں کا کردار انتہائی اہمیت کا حامل ہے،ڈائریکٹر نیب بلوچستان ہارون رشید

اتوار 3 دسمبر 2023 22:20

کوئٹہ (اُردو پوائنٹ اخبارتازہ ترین - اے پی پی۔ 03 دسمبر2023ء) نیب بلوچستان کے زیر اہتمام گورنمنٹ گرلز ڈگری کالج جناح ٹاؤن کوئٹہ میں ڈویژنل لیول پر تین ڈسٹرکٹ ، جن میں ڈسٹرکٹ کوئٹہ ، ڈسٹرکٹ پشین اور ڈسٹرکٹ چمن کے طلبا و طالبات کے درمیان اردو اور انگریزی تقاریر، مضمون نویسی ، کیلی گرافی اور پوسٹر سازی کے مقابلہ جات منعقد ہوئے۔ اس طرح کے مقابلے نیب ہر سال منعقد کرواتا ہے۔

ان مقابلوں کا بنیادی مقصد طلبا میں کرپشن کے خلاف شعور اجاگر کرنا ہے۔اس پروگرام کے مہمان خصوصی ڈاکٹر سعید احمد خان تھے۔جن کا تعلق مرسی کور بلوچستان سے تھا۔جب کہ اعزازی مہمانان ڈائریکٹر نیب بلوچستان ہارون رشید اور ڈائریکٹر ہائیراینڈ ٹیکنیکل ایجوکیشن کالجز پروفیسر ڈاکٹر کلیم اللہ لانگوتھے۔

(جاری ہے)

ان کے علاوہ دوسرے تعلیمی اداروں سے آئے ہوئے اساتذہ کرام طلبا و طالبات کی کثیر تعداد موجود تھی۔

طالب علموں نے ولولہ انگیز تقاریر پیش کرکے کرپشن اور بدعنوانی کے منفی اثرات پر اپنے اپنے انداز سے اظہار خیال کیا۔پروگرام کے دوران مہمان خصوصی ، ڈائریکٹر نیب ہارون رشید صاحب و دیگر مہمانان نے بدعنوانی کے خلاف اظہار خیال کیا۔اپنے خطاب میں انہوں نے کہاکہ کرپشن کے خاتمے کے لیے درس گاہوں کا کردار انتہائی اہمیت کا حامل ہےاور اگر اساتذہ و طالبات اپنے اپنے فرائض ایمان داری سے انجام دینے کو شعار بنایں تو یہ بھی کرپشن کے تدارک میں ایک اہم محرک بن سکتا ہے۔انہوں نے مقابلوں میں حصہ لینے والے طالب علموں کی کاوشوں کو بھی سراہا۔ پروگرام کے اختتام پر کامیاب قرار پانے والے طلبا و طالبات میں انعامات تقسیم کئے گئے۔