سپیکر قومی اسمبلی کی پنجاب یونیورسٹی پوٹھوار کیمپس گوجر خان کے قیام کے لیے 800 کنال زمین کی منظوری پر مبارکباد

منگل 5 دسمبر 2023 21:00

اسلام آباد (اُردو پوائنٹ اخبارتازہ ترین - اے پی پی۔ 05 دسمبر2023ء) سپیکر قومی اسمبلی راجہ پرویز اشرف نے پنجاب حکومت کی جانب سے پنجاب یونیورسٹی پوٹھوار کیمپس گوجر خان کے قیام کے لیے 800 کنال زمین کی منظوری پر گوجر خان کے عوام کو مبارکباد پیش کی ہے۔پنجاب یونیورسٹی پوٹھوار کیمپس گوجر خان کا یہ منصوبہ 3 سال کی مدت میں مکمل ہو گا۔ سپیکر قومی اسمبلی نے منگل کو ایک بیان میں کہا کہ بہت جلد پنجاب یونیورسٹی پوٹھوار کیمپس گوجر خان کا سنگ بنیاد رکھیں گے۔

اس ضمن میں 4 ارب روپے ہائر ایجوکیشن کمیشن (ایچ ای سی) کو جاری کر دیئے گئے ہیں۔ سپیکر قومی اسمبلی راجہ پرویز اشرف نے کہا کہ پنجاب یونیورسٹی پوٹھوہار کیمپس گوجر خان کا قیام میرا دیرینہ خواب تھا جو اب پورا ہونے جا رہا ہے۔

(جاری ہے)

انہوں نے کہا کہ اس یونیورسٹی کے قیام سے گوجر خان سمیت خطہ پوٹھوار اور ملحقہ اضلاع کے نوجوان طلباء وطالبات کا دیرینہ مسئلہ حل ہو گا۔

یونیورسٹی کے قیام سے گوجر خان اور ملحقہ اضلاع میں تعلیم کے شعبے میں نوجوانوں کو گھر کی دہلیز پر اعلیٰ تعلیم حاصل کرنے کے مواقع میسر آئیں گے۔ سپیکر نے کہا کہ اس منصوبے کی تکمیل سے خطہ پوٹھوار سمیت دیگر ملحقہ اضلاع اور آزاد کشمیر کے نوجوانوں کو اعلی تعلیم حاصل کرنے کے مواقع میسر آئیں گے۔اس منصوبے کا قیام اسپیکر قومی اسمبلی راجہ پرویز اشرف کا اعلیٰ تعلیم کے فروغ اور خطے کے نوجوان نسل کی ترقی کے لیے ان کی گہری دلچسپی کا عملی ثبوت ہے۔