باجوڑ میں ترکھانی اور اتمان خیل کے تمام سیاسی و قبائلی عمائدین کا اہم گرینڈ جرگہ ،جاری بدامنی کے بارے میں اپنی تجاویز پیش کیں

جمعہ 8 دسمبر 2023 16:40

باجوڑ (اُردو پوائنٹ اخبارتازہ ترین - این این آئی۔ 08 دسمبر2023ء) باجوڑ میں ترکھانی اور اتمان خیل کے تمام سیاسی و قبائلی عمائدین کا اہم گرینڈ جرگہ ہوا، ضلعی انتظامیہ، سیاسی، مذہبی اور علاقہ مشران نے باجوڑ میں حالیہ جاری بدامنی کے بارے میں اپنی تجاویز پیش کیں۔تفصیلات کے مطابق ترکھانی اور اتمان خیل کے تمام سیاسی و قبائلی عمائدین کا اہم گرینڈ جرگہ باجوڑ میں ہوا۔

جرگہ ممبران نے مشترکہ طور پر ایک کمیٹی تشکیل دیدی جو باجوڑ میں جاری بدامنی کے خاتمے کیلئے کورکمانڈر پشاور، آئی جی ایف سی نارتھ، آئی جی پولیس، چیف سیکرٹری اور دیگر اہم ذمہ داران سے ملاقاتیں کریں گے۔جرگہ میں اس بات پر اتفاق کیا گیا کہ علاقے میں امن و استحکام کا قیام مقامی لوگوں کے اپنے مفاد میں ہے،تمام سیاسی و قبائلی عمائدین نے پاک فوج اور قانون نافذ کرنے والے اداروں کے ساتھ مکمل تعاون کی یقین دہانی کروائی۔

(جاری ہے)

جرگہ ممبران نے غیر قانونی شہریوں کے خلاف حکومت کی کارروائیوں اور ان کے نتیجے میں ہونے والے مثبت اثرات کو سراہا -جرگہ ممبران نے افغانستان کی جانب سے ٹی ٹی پی کے دہشت گردوں کو دی جانے والی سہولتوں کو تنقید کا نشانہ بنایا۔تمام سیاسی و قبائلی عمائدین نے پاک فوج اور قانون نافذ کرنے والے اداروں کی جانب سے بھتہ خوری، سمگلنگ، غیر ملکی کرنسی اور دیگر غیر قانونی کاروبار کے خلاف کریک ڈاؤن کو سراہا۔