ملیرکی عوام کی محبتوں کا مقروض ہوں، کارکن جشن کی تیاری کریں،نہال ہاشمی

پیپلز پارٹی نے گذشتہ پندرہ سالوں میں ملیر کو تباہی کے دہانے پہنچایا، ملیر میں ہزارون صنعتوں کے باوجود نوجوان روزگار سے محروم ہیں،قادربخش کلمتی ودیگرکا خطاب

اتوار 21 جنوری 2024 19:55

کراچی(اُردو پوائنٹ اخبارتازہ ترین - این این آئی۔ 21 جنوری2024ء) پاکستان مسلم لیگ(ن) کے سینئررہنما نہال ہاشمی نے کہاہے کہ ملیرکی عوام کی محبتوں کا مقروض ہوں، کارکن جشن کی تیاری کریں، عام انتخابات میں مسلم لیگ ن کے امیدوار کامیاب ہونگے، 8 فروری عوام کے فتح کا دن ہوگا، پیپلز پارٹی نے گذشتہ پندرہ سالوں میں ملیر کو تباہی کے دہانے پہنچایا، ملیر میں ہزارون صنعتوں کے باوجود نوجوان روزگار سے محروم ہیں۔

ان خیالات کا اظہارانہوں نے ریلی سے خطاب کرتے ہوئے کیا۔اس موقع پر مسلم لیگ ن کی جانب سے این اے 229 کے نامزد امیدوار قادر بخش کلمتی، پی ایس 85 کے نامزد امیدوار حفیظ اللہ جان سرہندی، پی ایس 86 کے نامزد امیدوار یعقوب خاصخیلی، پی ایس 84 کے امیدوار و دیگر نے بھی خطاب کیا۔

(جاری ہے)

مسلم لیگ کے نامزد امیدواروں نے انتخابی مہم کے سلسلے میں جام گوٹھ سے میمن گوٹھ تک ریلی کا انعقاد کیا گیا۔

جس میں کارکنان و اہل علاقہ نے بڑی تعداد میں شرکت کی۔ ریلی کے اختتام پر میمن گوٹھ میں انتخابی دفتر کا افتتاح کیا گیا۔ اس موقع پر خطاب کرتے ہوئے نہال ہاشمی،قادر بخش کلمتی، حفیظ اللہ سرہندی، یعقوب خاصخیلی و دیگر نے کہاہم ملیر کی عوام کی دی ہوئی محبتوں کے مقروض ہیں۔ ملیر کی عوام تبدیلی کا خواہان ہے، گذشتہ پندرہ برس سندھ میں پیپلز پارٹی کی حکومت رہی لیکن ملیر کو مسلسل نظرانداز کیا گیا۔

ملیر کے لوگ بنیادی سہولیات سے محروم ہیں، ملیر کی عوام پینے کے پانی کی بوند بوند کو ترس رہی ہے، تعلیمی اداروں میں فرنیچر و اساتذہ نہیں ہیں۔ گرین بلیٹ کو تباہ کیا گیا، مقامی آبادگاروں کی زمینوں کے لیز کینسل کرکے قبضہ مافیا کی سہولت کاری کی گئی، پیپلز پارٹی کی آشیرواد سے قبضہ مافیا نے ملیر کے ندی نالے و قبرستان بھی فروخت کردئے، ترقیاتی منصوبے کرپشن کے بھینٹ چڑھ گئے۔

ملیر میں صنعتی زون قائم ہے ہزارون فیکٹریاں چل رہی ہیں لیکن اس کے باوجود ملیر کے نوجوان بیروزگار ہیں۔ پندرہ سالوں میں پیپلز پارٹی کے منتخب نمائندے نوجوانوں کو روزگار فراہم کرنے میں ناکام رہے انہون نے کہا ملیر کی عوام اب آزمائے ہوئے لوگون کو دوبارہ نہیں آزمائیگی 8 فروری کو مسلم لیگ ن کے امیدوار کامیاب ہونگے کارکنان جشن کی تیاری کریں۔