سوات ،شیر شاہ خان نے خاندان ،ساتھیوں سمیت محمود خان ،محب اللہ خان کی حمایت کا اعلان کردیا

بدھ 31 جنوری 2024 22:39

سوات(اُردو پوائنٹ اخبارتازہ ترین - این این آئی۔ 31 جنوری2024ء) سوات میں کوزہ بانڈئی کے اہم سیاسی خاندان اور عوامی نیشنل پارٹی کے بزرگ رہنما شیر شاہ خان نے اپنے خاندان اور ساتھیوں سمیت این اے 4 پر پی ٹی آئی پی کے امیدوار و سابق وزیر اعلیٰ محمود خان اور پی کی9 پر صوبائی اسمبلی کے امیدوار محب اللہ خان کی مکمل حمایت کا اعلان کردیا ۔سابق وزیر اعلیٰ اور وائس چیئرمین پی ٹی آئی پی محمودخان نے اے این پی کے بزرگ رہنما شیر شاہ خان سے ان کی رہائش گاہ پر ملاقات کی ۔

(جاری ہے)

اس موقع پر شیرشاہ خان اور ان کے خاندان سمیت دیگر قریبی ساتھی بھی موجود تھے ۔ شیر شاہ خان نے سوات کی تعمیر و ترقی کے لئے سابق وزیر اعلی محمود خان کی خدمات کو سراہااور کہاکہ ان کے مثبت کردار اور کارکردگی کی مثال نہیں ملتی۔انہوں نے کہاکہ علاقے کے بہتر مفاد کی خاطر سابق وزیر اعلی محمود خان کی حمایت کا اعلان کرتے ہیں کیونکہ جتنے بھی لوگ میدان میں ہیں وہ سابق وزیر اعلیٰ محمود خان کے مقابلے میں کچھ بھی نہیں۔ انہوں نے محمودخان کی مکمل حمایت کا اعلان کیا اور عوام سے بھی اپیل کی کہ وہ بھی سوات کی ترقی اور خوشحالی کے لئے محمود خان کا ساتھ دیں۔