امن و امان کی صورتحال کو سبوتاژ کرنے کی ہر کوشش کو ناکام بنایا جائے گا، وزیراعظم

اسلام آباد ( اُردو پوائنٹ اخبارتازہ ترین ۔ 07 فروری 2024ء ) نگران وزیراعظم انوار الحق کاکڑ نے پشین اور قلعہ سیف اللہ کے علاقے میں دھماکوں کی رپورٹ طلب کرلی۔ تفصیلات کے مطابق نگران وزیراعظم نے پشین اور قلعہ سیف اللہ میں دھماکوں کی رپورٹ طلب کرتے ہوئے کہا ہے کہ امن و امان کی صورتحال کو سبوتاژ کرنے کی ہر کوشش کو ناکام بنایا جائے گا، انتخابات کے پر امن انعقاد کیلئے پر عزم ہیں۔

بلوچستان کے نگران وزیر اطلاعات جان اچکزئی نے کہا کہ دہشت گردی کے انتہائی افسوسناک واقعات ہوئے، دھماکوں کے ذریعے کوشش کی گئی ہے کہ بلوچستان میں الیکشن کے عمل کو سبوتاژ کیا جائے لیکن یہ ایک ناکام کوشش ہے، کل الیکشن ہوں گے اور پرامن ہوں گے، عوام نکلیں گے اور دہشتگردوں کے عزائم خاک میں ملائیں گے۔

(جاری ہے)

انہوں نے کہا کہ صوبے بھر میں ایک ماہ کے دوران ہزاروں جلسے اور کارنر میٹنگز ہوئی ہیں انشاءاللہ کل کا دن بھی پرامن ہوگا، صوبائی حکومت اس افسوسناک واقعے کے بعد اپنی ذمہ داریوں کے حوالے سے الرٹ ہے اور اگر ضرورت پڑی تو شدید زخمیوں کو وزیراعلیٰ کے طیارے میں علاج کے لیے دیگر شہروں میں منتقل کیا جائے گا۔

بتاتے چلیں کہ بلوچستان کے علاقے قلعہ سیف اللہ میں سیاسی جماعت کے دفتر کے قریب دھماکے میں 8 افراد جاں بحق ہوگئے، صوبائی دارالحکومت کوئٹہ سے 170 کلو میٹر دور قلعہ سیف اللہ کے علاقے میں ہونے والا دھماکہ بلوچستان سے قومی اسمبلی کے حلقہ این اے 251 سے جمعیت علماء اسلام ف کے امیدوار مولانا واسع کے انتخابی دفتر کے باہر ہوا، جو اس حملے میں محفوظ رہے تاہم دھماکے کے وقت کارکنوں کی بڑی تعداد دفتر میں موجود تھی، جس کی وجہ سے مزید جانی نقصان کا خدشہ ہے۔

بتایا گیا ہے کہ دھماکے کے بعد وہاں انتخابی دفتر کے قریب موجود موٹرسائیکلوں اور گاڑیوں کو آگ لگ گئی، دھماکے کے بعد قانون نافذ کرنے والے اداروں نے علاقے کو گھیرے میں لے لیا، دھما کے کی اطلاع ملتے ہی ریسکیو اہلکار بھی موقع پر پہنچے جنہوں نے زخمیوں کو فوری طور پر ہسپتال منتقل کردیا، اسی دوران فائر بریگیڈ کا عملہ بھی جائے وقوعہ پر پہنچ گیا۔

قبل ازیں صوبہ بلوچستان ہی کے ضلع پشین میں خانوزئی کے علاقے میں آزاد امیدوار کے دفتر کے باہر دھماکہ ہوا، پی بی 47 میں آزاد امیدوار کے انتخابی دفتر کے قریب دھماکے کے نتیجے میں جاں بحق افراد کی تعداد 15 ہوگئی، ایم ایس ڈاکٹر حبیب کا کہنا ہے کہ اب تک دھماکے میں جاں بحق 12 افراد کی میتیں تحصیل ہسپتال خانوزئی منتقل کی گئی ہیں، دھماکے میں 30 سے زائد زخمی افراد ہسپتال منتقل کیے گئے، بیشتر زخمیوں کی حالت تشویشناک ہے۔