عام انتخابات ،13 خواجہ سراؤں میں سے کوئی بھی نشست نہ جیت سکا

ہفتہ 10 فروری 2024 18:03

لاہور(اُردو پوائنٹ اخبارتازہ ترین - این این آئی۔ 10 فروری2024ء) ملک بھر میں قومی و صوبائی نشستوں پر کوئی بھی خواجہ سراجیت کر پارلیمنٹ نہ پہنچ سکا۔حالیہ الیکشن میں ملکی تاریخ میں پہلی بار 13 خواجہ سراء بھی انتخابی دنگل میں شامل تھے،ان خواجہ سرائوں میں سے دو قومی جبکہ 11 صوبائی اسمبلیوں کی نشستوں پر قسمت آزما تھے۔انتخابی معرکے میں حصہ لینے والے خواجہ سراء امیدواروں میں فرزانہ ریاض این اے 33، آرزو خان پی کے 33، لبنیٰ پی پی 26، کومل پی پی 38، میڈم بھٹو پی پی 189، نایاب این اے 142جبکہ ندیم کشش قومی اسمبلی اور عاشی، بلال خان بے بو پنجاب اسمبلی کی نشست کے لیے انتخاب لڑ رہے تھے۔

وفاقی دارالحکومت سے تعلق رکھنے والے اعلیٰ تعلیم یافتہ خواجہ سراء نایاب نے این اے 142 میں بھر پور انتخابی مہم چلائی لیکن ووٹرز کی حمایت نہ حاصل کر سکیں۔

(جاری ہے)

پشاور کے حلقہ این ای33 میں فرزانہ ریاض نے بھی اپنی کمیونٹی کی آواز پارلیمان میں پہنچانے کیلئے انتخابی دنگل کے دوران بھر پور ڈور ٹو ڈور مہم چلائی لیکن وہ بھی نشست نہ جیت سکیں۔اسی طرح آرزو خان پی کے 33، لبنیٰ پی پی 26، کومل پی پی 38، میڈم بھٹو پی پی 189، عاشی ، بلال خان بے بھی صوبائی اسمبلی کی نشست پر کامیاب نہ ہو سکے۔

انتخانی نتائج کے بعد خواجہ سراؤں نے کہا کہ ہم نے بھی جمہوری نظام اور انتخابی عمل میں اپنا بھر پور حصہ ملایا ہے اور ثابت کیا کہ خواجہ سراء بھی انسان اور اس معاشرے کے اہم رکن ہیں۔انہوں نے کہا کہ خواہش ہے کہ پارلیمان میں ہماری بھی نمائندگی ہو، ہم ان تمام ووٹرز کا شکریہ ادا کرتے ہیں جنہوں نے ہمیں ووٹ دیا اور ان کا بھی جنہوں نے ووٹ نہیں دیا، ہم اپنی جمہوری جدوجہد مستقبل میں بھی جاری رکھیں گے۔