شادی شدہ افراد ’’سنگلز‘‘لوگوں سے زیادہ خوش ہوتے ہیں، سر وے

واشنگٹن(اُردو پوائنٹ اخبارتازہ ترین - این این آئی۔ 12 فروری2024ء) امریکی ملٹی نیشنل تجزیوں کی کمپنی گیلپ نے حال ہی میں ایک سروے کیا جس کا مقصد اس بات کا تعین کرنا تھا کہ شادی شدہ افراد اور سنگلز (جو کسی بھی رشتے میں منسلک نہیں ہوتی)، ان میں سے زیادہ خوش باش زندگی کون گزار رہا ہوتا ہے۔شادی شدہ افراد کسی بھی دوسرے رشتے کی حیثیت میں رہنے والوں کے مقابلے میں نمایاں طور پر خوش ہوتے ہیں۔

امریکی خبر رساں ادارے کے مطابق گیلپ کا یہ سروے کروانے والے مصنف جوناتھن روتھ ویل کا اس حوالے سے کہنا تھا کہ بظاہر ہمیں شادی شدہ ہونے میں زیادہ فائدہ نظر آتا ہے، لیکن اس کے لیے یہ بھی اہم ہے کہ لوگ اپنی زندگی کیسے گزا ررہے ہیں۔اس سروے میں 2.5 ملین سے زیادہ امریکی افراد سے کہا گیا کہ وہ 2009 اور 2023 کے درمیان اپنی زندگی کو صفر سے دس کا درجہ دیں۔

(جاری ہے)

سروے کے مطابق اعداد و شمار سے پتہ چلا کہ شادی شدہ افراد نے سروے کے دورانیے میں سنگل جواب دہندگان کے مقابلے میں زیادہ خوشی اور اطمینان ظاہر کیا۔یونیورسٹی آف ورجینیا میں سماجیات کے پروفیسر اور نیشنل میرج پروجیکٹ کے ڈائریکٹر بریڈفورڈ ولکوکس نے کہا کہ عمر ، جنس اور تعلیم جیسی چیزیں اہمیت رکھتی ہیں لیکن جب بات اچھی اور خوشگوار زندگی گزارنے کی ہو تو شادی ان سب سے زیادہ اہمیت رکھتی ہے۔