روسی تیل کی خریداری بند کرنے پر بھارت کے ساتھ تجارتی معاہدہ کریں گے ، امریکہ

جمعہ 12 ستمبر 2025 08:30

واشنگٹن (اُردو پوائنٹ اخبارتازہ ترین - اے پی پی۔ 12 ستمبر2025ء) امریکہ نے کہاہے کہ وہ روسی تیل کی خریداری بند کرنے پر بھارت کے ساتھ تجارتی معاہدہ کرے گا ۔ رائٹرز کے مطابق امریکا کے وزیر تجارت ہاورڈ لیوٹنک نے کہا کہ انہیں یقین ہے کہ امریکا جلد ہی انڈیا کے ساتھ تجارتی معاہدہ طے کر لے گا جب انڈیا روسی تیل خریدنا بند کر دے گا۔انہوں نے صحافیوں سے بات کرتے ہوئے کہاکہ ہم بھارت کے معاملات طے کر لیں گے، جب وہ روسی تیل خریدنا بند کرے گا۔

(جاری ہے)

انہوں نے یہ بھی کہا کہ ہمارا تائیوان کے ساتھ ایک بڑا معاہدہ ہونے والا ہے۔اور انہوں نے عندیہ دیا کہ سوئٹزرلینڈ کے ساتھ بھی جلد ایک تجارتی معاہدہ طے پا جائے گا۔جنوبی کوریا کے حوالے سے انہوں نے کہا کہ ہم نے معاہدہ کر لیا ہے، لیکن اب دیکھتے ہیں کہ وہ کاغذی کارروائی مکمل کرتے ہیں یا نہیں۔جب ان سے پوچھا گیا کہ جارجیا میں ہنڈائی کے پلانٹ پر امیگریشن ریڈ نے کیا اس معاہدے کو مؤخر کیا، تو انہوں نے اس پر تبصرہ کرنے سے انکار کر دیا۔