کراچی، الیکشن کمیشن نے این اے 235، 236 پر انتخابی عذرداری کیس کا فیصلہ محفوظ کرلیا

بدھ 21 فروری 2024 20:49

اسلام آباد (اُردو پوائنٹ اخبارتازہ ترین - این این آئی۔ 21 فروری2024ء) الیکشن کمیشن نے کراچی کے حلقہ این اے 235 اور 236 پر انتخابی عذرداری کیس کا فیصلہ محفوظ کرلیا ہے۔ممبر سندھ نثار درانی اور ممبر پنجاب بابر حسن بھروانہ نے مقدمے کی سماعت کی، ممبر نثار درانی نے ریمارکس دئیے کہ این اے 235 اور این اے 236 کے ریٹرننگ افسران نے رپورٹس جمع کروادی ہیں۔

(جاری ہے)

درخواست گزار سیف الرحمن کے وکیل نے بتایا کہ ہماری صرف ایک درخواست ہے کہ فارم 45 اور فارم 47 میں فرق ہے، سندھ ہائی کورٹ نے الیکشن کمیشن کو 22 فروری تک فیصلہ سنانے کی ہدایت کی ہے، الیکشن کمیشن نے فیصلہ کرنا ہے کہ اصلی فارم 45 کون سے ہیں اور جعلی کون سے، اگر جعلی فارم 45 پر نتائج بنائے گئے ہیں تو حلقہ کے نتائج کو کالعدم قرار دینا ہوگا۔مبر بابر حسن بھروانہ نے کہا کہ پورے ملک سے فارم 45 کی شکایات ہیں، الیکشن کمیشن لاکھوں 45 کی اسکروٹنی کیسے کری فارم 45 کا فارنزک کرنا تو بظاہر کرمنل نوعیت کا معاملہ ہے، وکیل نے کہا الیکشن کمیشن فارم 45 کی تحقیقات کے لیے کسی فارنزک کمپنی کی خدمات بھی حاصل کرسکتا ہے ۔

بعد ازاں الیکشن کمیشن نے این اے 235، این اے 236 کراچی انتخابی عذرداریوں پر فیصلہ محفوظ کرلیا۔