ہائیر ایجوکیشن کمیشن کی کورس ڈیزائن کمیٹی کا اجلاس،تیار کردہ کورس کا جائزہ لیا

منگل 12 مارچ 2024 17:14

اسلام آباد (اُردو پوائنٹ اخبارتازہ ترین - اے پی پی۔ 12 مارچ2024ء) ہائر ایجوکیشن کمیشن (ایچ ای سی) پاکستان نے پاکستان سٹڈیز پر ایک کورس تیار کیا ہے اورانڈر گریجویٹ ایجوکیشن پالیسی کے تعلیمی جزو میں اس کو شامل کرنے پر زور دیا ہے۔اس سلسلے میں ایچ ای سی کی کورس ڈیزائن کمیٹی نے ایچ ای سی ریجنل سینٹرکراچی میں ایک اہم اجلاس منعقد کیا جس میں انڈر گریجویٹ پروگرامز کے لئے دو کریڈٹ کورس ’پاکستان سٹڈیز‘ کے عنوان سے تشکیل دیا گیا۔

ڈپٹی ڈائریکٹر ایچ ای سی محمد علی بیگ نے سیشن کا آغازکیا۔ ایچ ای سی سے جاری پریس ریلیز کے مطابق انہوں نے پاکستان سٹڈیز پر ایک باریک بینی سے تیار کردہ کورس کی ضرورت پر زور دیا جو طلباء کو پاکستان کی شناخت کی ایک جامع دریافت پیش کرے جس میں پاکستان کی جغرافیائی، تاریخی اور ثقافتی جہتیں شامل ہیں۔

(جاری ہے)

کمیٹی میں شعبہ کے ممتاز ماہرین شامل تھے جن میں چیئرپرسن شعبہ پاکستان سٹڈیز، گورنمنٹ کالج یونیورسٹی، فیصل آباد، پروفیسر ڈاکٹر عبدالقادر مشتاق، پروفیسر ڈاکٹر عبدالقادر مشتاق ،چیئرمین شعبہ پاکستان سٹڈیز بہاؤالدین زکریا یونیورسٹی ملتان پروفیسر ڈاکٹر جاوید اختر سلیانہ، چیئرمین ڈیپارٹمنٹ آف ہسٹری اینڈ پاکستان سٹڈیز پنجاب یونیورسٹی لاہور ڈاکٹر محبوب حسین، ڈائریکٹر پاکستان سٹڈی سینٹر بلوچستان یونیورسٹی کوئٹہ پروفیسر ڈاکٹر محمد عثمان،ڈائریکٹر پاکستان سٹڈی سنٹر پنجاب یونیورسٹی لاہور پروفیسر ڈاکٹر نعمانہ کرن، ڈائریکٹر پاکستان سٹڈی سینٹر سندھ یونیورسٹی جامشور ڈاکٹر شجاع احمد مہیسر، ڈائریکٹر نیشنل انسٹی ٹیوٹ آف پاکستان سٹڈیز قائداعظم یونیورسٹی اسلام آباد ایسوسی ایٹ پروفیسر ڈاکٹر محمد حنیف خان، چیئرپرسن شعبہ پاکستان سٹڈیز اسلامیہ یونیورسٹی آف بہاولپور ایسوسی ایٹ پروفیسر ڈاکٹر روبینہ یاسمین اور انچارج پاکستان سٹڈی سینٹر جامعہ کراچی اسسٹنٹ پروفیسر ڈاکٹر ارم مظفر شامل تھے۔

کمیٹی نے کورس کو ڈیزائن کیا اور انڈرگریجویٹ ایجوکیشن پالیسی کے عمومی تعلیم کے جزو میں اس کی شمولیت کی اہمیت پر زور دیا تاہم کمیٹی نے اس بات پر زور دیا کہ اس کورس کو موجودہ "آئیڈیالوجی اینڈ کنسٹی ٹیوشن آف پاکستان" کورس کے متبادل کے طور پر کام نہیں کرنا چاہئے جیسا کہ اسی پالیسی میں بیان کیا گیا ہے۔