عید کی چھٹیوں میں مری میں تیز بارشوں کے باعث لینڈ سلائیڈنگ کا خدشہ ہے، محکمہ موسمیات

پیر 8 اپریل 2024 17:39

اسلام آباد (اُردو پوائنٹ اخبارتازہ ترین - اے پی پی۔ 08 اپریل2024ء) محکمہ موسمیات نے مری اور گلیات میں عید کی چھٹیوں کے دوران 13 سے 15 اپریل تک تیز بارشوں اور لینڈ سلائیڈنگ کے خدشہ کے پیش نظر محتاط رہنے کی ہدایت کی ہے۔ محکمہ موسمیات اسلام آباد کی جانب سے جاری ایڈوائزری کے مطابق مغربی ہواؤں کے دو سلسلے 10 اپریل اور 12 اپریل کو ملک میں داخل ہوں گے جن کے باعث 10 سے 15 اپریل کے دوران تیز آندھی، جھکڑ چلنے اور گرج چمک کے ساتھ بارش کی توقع ہے۔

محکمہ موسمیات کی پیشگوئی کے مطابق، راولپنڈی/ اسلام آباد، مری، چکوال، جہلم اور پنجاب کے دیگر حصوں میں 10 اپریل سے 15 اپریل تک وقفہ وقفہ سے آندھی اور بارشوں کی توقع ہے۔ مغربی ہواؤں کے ان دو سلسلوں کی وجہ سے بلوچستان، خیبرپختونخوا، گلگت بلتستان و کشمیر اور صوبہ سندھ کے بھی کئی حصوں میں بارش اور گرج چمک کی توقع ہے۔

(جاری ہے)

اس پیشگوئی کے پیش نظرضلعی انتظامیہ نے عید کے موقع پر مری میں تمام محکموں کو الرٹ رہنے کی ہدایت جاری کی ہے اور کہا ہے کہ عید کے دوران مری میں سیاحوں کی تعداد میں خاطر خواہ اضافہ ہو جاتا ہے اور ان حالات میں سیاحوں کے تحفظ کیلئے ممکنہ اقدامات کئے جائیں۔

جاری مراسلہ میں تمام سرکاری افسران کو ہدایت کی گئی ہے کہ عید کے دنوں میں مری کے داخلی اور خارجی راستوں کی خصوصی نگرانی کی جائے اور مری میں داخل اور خارج ہونی والی گاڑیوں کی تعداد کو مقررہ ایس او پیز کے مطابق کنٹرول کیا جائے۔ انہوں نے کہا کہ شہریوں کی مناسب رہنمائی کی جائے اور ان کو تیز بارش کی صورت میں سڑکوں پر پھسلنے کے خطرات سے آگاہ کیا جائے۔