این اے 81 گوجرانوالہ سے سنی اتحاد کونسل کے رانا بلال اعجاز کی کامیابی برقرار

جمعرات 25 اپریل 2024 22:32

لاہور (اُردو پوائنٹ اخبارتازہ ترین - آن لائن۔ 25 اپریل2024ء) لاہور ہائیکورٹ نے قومی اسمبلی حلقہ این اے 81 گوجرانوالہ سے سنی اتحاد کونسل کے رانا بلال اعجاز کی کامیابی کو برقرار رکھتے ہوئے الیکشن کمیشن کے ن لیگ کے اظہر قیوم کی درخواست پر دوبارہ گنتی کے نوٹیفکیشن کو غیر قانونی قرار دیدیا۔

(جاری ہے)

جسٹس شاہد کریم نے چوہدری بلال اعجاز کی درخواست پر تحریری فیصلہ جاری کیا ہے جس میں قرار دیا گیا ہے کہ فارم 47، 48 اور 49 جاری ہونے کے بعد دوبارہ گنتی نہیں ہو سکتی، انتخابی عمل یا الیکشن پروسیس کے دوران ووٹوں کی گنتی کا نوٹیفکیشن جاری ہوسکتا تھا۔

عدالت نے تحریری فیصلے میں باور کرایا ہے کہ الیکشن کمیشن کا دوبارہ ووٹوں کی گنتی کا نوٹیفکیشن قانونی اثر نہیں رکھتا، عدالت دوبارہ ووٹوں کی گنتی کا نوٹیفکیشن کالعدم قرار دیتی ہے، دوبارہ ووٹوں کی گنتی کا 18 مارچ کا نوٹیفکیشن غیر قانونی ہے۔ عدالت نے تحریری فیصلے میں مزید لکھا ہے کہ ریکارڈ کے مطابق ریٹرننگ افسر نے مخالف امیدوار اظہر قیوم کی دوبارہ ووٹوں کی گنتی کی درخواست خارج کر دی۔ درخواست گزار نے ایک لاکھ 17 ہزار سات سو 17 ووٹوں سے کامیابی حاصل کی۔