خواجہ عمران نذیر کی حج تربیتی سیشن میں بطور مہمانِ خصوصی شرکت

حج تربیتی سیشنز عازمین کو مناسکِ حج کی درست ادائیگی میں اہم کردار ادا کرتے ہیں ، صوبائی وزیر

منگل 5 مئی 2026 20:43

خواجہ عمران نذیر کی حج تربیتی سیشن میں بطور مہمانِ خصوصی شرکت

لاہور (اُردو پوائنٹ اخبارتازہ ترین - آن لائن۔ 05 مئی2026ء) صوبائی وزیر صحت و آبادی خواجہ عمران نذیر نے حج تربیتی سیشن میں بطور مہمانِ خصوصی شرکت کی، جہاں عازمینِ حج کو ویکسینیشن، طبی احتیاطی تدابیر اور دورانِ حج صحت سے متعلق ضروری رہنمائی فراہم کی گئی۔ اس موقع پر خطاب کرتے ہوئے انہوں نے کہا کہ حج جیسے عظیم فریضے کی ادائیگی سے قبل مکمل تربیت انتہائی ضروری ہے تاکہ عازمین نہ صرف مناسکِ حج درست طریقے سے ادا کر سکیں بلکہ اپنی صحت کا بھی بھرپور خیال رکھ سکیں۔

خواجہ عمران نذیر نے کہا کہ حج تربیتی سیشنز عازمین کو مناسکِ حج کی درست ادائیگی میں اہم کردار ادا کرتے ہیں اور حکومت پنجاب عازمینِ حج کو بہترین طبی سہولیات اور رہنمائی فراہم کرنے کے لیے بھرپور اقدامات کر رہی ہے۔

(جاری ہے)

انہوں نے اس بات پر زور دیا کہ دورانِ حج پیش آنے والے ممکنہ طبی مسائل سے نمٹنے کے لیے پیشگی آگاہی اور تربیت ناگزیر ہے۔

صوبائی وزیر نے عازمینِ حج کو مقدس فریضے کی ادائیگی پر مبارکباد دیتے ہوئے ان سے اپیل کی کہ وہ حرمین شریفین میں پاکستان کی سلامتی، استحکام اور ترقی کے لیے خصوصی دعائیں کریں۔ انہوں نے مزید کہا کہ عازمین امتِ مسلمہ کے اتحاد اور پاکستان کی عالمی سطح پر مثبت کردار کی کامیابی کے لیے بھی دعاگو رہیں۔انہوں نے یقین دہانی کرائی کہ حکومت پنجاب عازمینِ حج کی صحت و حفاظت کو یقینی بنانے کے لیے ہر ممکن اقدامات جاری رکھے ہوئے ہے تاکہ وہ اس مقدس سفر کو بخیر و عافیت مکمل کر سکیں۔