ترقیاتی منصوبوں میں تاخیر نہیں ہونی چاہیے،وزیراعلیٰ پنجاب مریم نواز

وزیراعلیٰ پنجاب نے نواز شریف انسٹیٹیوٹ آف کینسر لاہور کا پہلا فیز سال میں مکمل کرنے کی ہدایات جاری کر دیں،وزیراعلیٰ پنجاب کی زیر صدارت پلاننگ اینڈ ڈویلپمنٹ بورڈ میں 5گھنٹے طویل اجلاس

فیصل علوی منگل 7 مئی 2024 16:39

ترقیاتی منصوبوں میں تاخیر نہیں ہونی چاہیے،وزیراعلیٰ پنجاب مریم نواز

لاہور(اردو پوائنٹ اخبارتازہ ترین۔07مئی 2024 ء) وزیراعلیٰ پنجاب مریم نواز نے کہا ہے کہ صوبے میں ہونے والے ترقیاتی منصوبوں میں تاخیر نہیں ہونی چاہیے،منصوبوں کی بروقت تکمیل کیلئے دن رات محنت کی جائے،وزیراعلیٰ پنجاب نے نواز شریف انسٹیٹیوٹ آف کینسر لاہور کا پہلا فیز سال میں مکمل کرنے کی ہدایات جاری کر دیں۔وزیراعلیٰ پنجاب مریم نواز کی زیر صدارت پلاننگ اینڈ ڈویلپمنٹ بورڈ میں 5گھنٹے طویل اجلاس ہوا جس میں سینئر صوبائی وزیر مریم اورنگزیب، صوبائی وزراءعظمیٰ زاہد بخاری، مجتبیٰ شجاع الرحمن، شیر علی گورچانی، خواجہ عمران نذیر، خواجہ سلمان رفیق، فیصل ایوب کھوکھر ، ذیشان رفیق، بلال اکبر، عاشق حسین کرمانی، ایم پی اے ثانیہ عاشق، چیف سیکرٹری، چیئرمین پلاننگ اینڈ ڈویلپمنٹ بورڈ، آئی جی ،سیکرٹریز نے شرکت کی۔

(جاری ہے)

اجلاس میں چیف منسٹر سپیشل ترقیاتی منصوبوں اور دیگر اقدامات کا تفصیلی جائز ہ لیا گیا۔ وزیراعلیٰ پنجاب کو بریفنگ دی گئی کہ ہیلتھ سیکٹر میں145 ارب کی لاگت سے 7 میگا پراجیکٹ زیر تکمیل ہیں۔ وزیراعلیٰ پنجاب نے ہدایات جاری کیں کہ صحت کے منصوبوں کو بروقت تکمیل کیا جائے ۔مریم نواز نے تمام محکموں کے لئے ایک کمپلینٹ نمبر مخصوص کرنے کی ہدایت کردی۔

اجلاس میں بتایا گیا کہ اضلاع میں سمارٹ سیف سٹی یکم جنوری تک فنکشنل ہوں گے۔وزیراعلیٰ پنجاب کو بریفنگ دی گئی کہ لاہور میں تین سو اور دیگر شہروں میں 330 الیکڑک بسیں چلائی جائیں گی۔ اس حوالے سے اجلاس میں الیکٹرک بسوں کی مقامی سطح پر تیاری کے تجویز کا جائزہ لیا گیا۔بریفنگ کے دوران یہ بھی بتایاگیا کہ دیہی اور بنیادی مراکز صحت کی تعمیر و بحالی کا پہلا مرحلہ اکتوبر میں مکمل کر لیا جائے گا، بڑے ہسپتالوں کی ری ویمپنگ جون تک مکمل کر لی جائے گی۔ اجلاس میں بتایا گیا کہ سی ایم سکل ڈویلپمنٹ پروگرام کے تحت 4 ہزار نوجوان آئی ٹی کورسز کریں گے۔ اس کے علاوہ پراونشنل ڈیٹا بیس اتھارٹی کے تحت سوشل رجسٹری سروے شروع کردئیے گئے، جس کی جون میں تکمیل کا ہدف مقرر کیا گیا ہے۔