ش*معاشی نظام مفلوج ہو چکا، جماعت اسلامی عوام کو مہنگائی سے نجات دلا سکتی ہے

^لاہور (اُردو پوائنٹ اخبارتازہ ترین - آن لائن۔ 09 مئی2024ء) امیر جماعت اسلامی پنجاب وسطی اور امید وار این اے 124 محمد جاوید قصوری نے کہا ہے کہ پی ڈی ایم اور پی ٹی آئی کی حکومتوں نے پورے معاشی نظام کو ہی مفلوج کر کے رکھ دیا ہے ، جو بھی حکومت بر سر اقتدار آئی اس نے آئی ایم ایف کے در پر سجدہ ریز ہونے میں ہی عافیت جانی ۔ عوام کی زندگی عملا اجیرن ہو چکی ہے ۔

حکمرانوں کی کارکردگی دعووں ، وعدوں، زبانی کلامی اور ڈنگ ٹپائو اقدامات تک محدود ہے۔ عملی اقدامات کہیں نظر نہیں آتے۔جماعت اسلامی عوام کو مہنگائی سے نجات دلا سکتی ہے ۔ان کا کہنا تھا کہ پاکستان کو اللہ تعالیٰ نے وسائل کی دولت سے نوازاہے مگر حکمرانوں کی نا قص پالیسیوں کے سبب ہم ان سے بھر پورانداز میں استفادہ کرنے سے قاصر ہیں بلکہ الٹاان قدرتی وسائل سے غیر ملکی کمپنیاں فائدہ اٹھاتے ہوئے ثمرات حاصل کررہی ہیں۔

(جاری ہے)

ہمیں قرضوں کی بجائے خود انحصاری اوراپنے وسائل سے استفادہ کرنا ہوگا تب ہی جاکر ہم ترقی یافتہ ممالک کی صف میں کھڑے ہوسکتے ہیں۔ عوام کو ایک کروڑ نوکریاں دینے اور پچاس لاکھ گھروں کی تعمیر کا وعدہ کرنے والے بھی اب بے نقاب ہو چکے ہیں۔ مہنگائی، بے روزگاری کی شرح آسمان سے باتیں کررہی ہے۔ انہوں نے کہا کہ پی ڈی ایم اور پی ٹی آئی کی حکومتوں کی ناقص حکومتی پالیسیوں کے باعث ملک مسائلستان بن چکا ہے۔

کرپٹ مافیا نے ہر سطح پر لوٹ مار مچا رکھی ہے۔ بد قسمتی سے موجودہ نگران حکمران بھی سابقہ حکمرانوں کے نقش قدم پر چل رہے ہیں۔ پاکستان اس وقت مسائل کے گرداب میں دھنستا چلا جا رہا ہے ۔ عوام کو کسی قسم کا کوئی ریلیف میسر نہیں ، ادارے تباہی کے دھانے پر پہنچ چکے ہیں ۔ جب تک کرپٹ افراد مسلط ہیں اس وقت تک ملک کے اندر خوشحالی کا خواب شرمندہ تعبیر نہیں ہو سکتا۔

معاشی پالیسیوں میں تسلسل اور سیاسی استحکام ناگزیز ہے ۔محمد جاوید قصوری نے اس حوالے سے مزید کہا کہ حکومتی ناقص کارکردگی کے باعث عوام میں شدید غصہ پایا جاتا ہے۔ پروٹوکول کی نفی اورقوم کو کفایت شعاری کا درس دینے والے دو درجن گاڑیوں کے قافلے میں گھومتے پھرتے رہے ہیں۔ معیشت کی تباہی کے اصل ذمہ دار وہ لوگ ہیں جنھوں نے سیاسی مخالفین کو دبانے اور ان کوگرفتار کرنے کے سوا کچھ نہیں کیا ۔ چوروں لیٹروں اور کرپٹ افراد کا محاسبہ اداروں کا کام ہے اور ضرورت اس امر کی ہے وہ بغیر کسی سیاسی دبائو کے اپنا کام کریں۔