امتحانی نظام کو جدید خطوط پر استوار کرنے کیلئے خود کار ڈیجیٹل سسٹم متعارف کرادیا گیا ، چیئرمین بلوچستان بورڈ آف انٹرمیڈیٹ

کوئٹہ (اُردو پوائنٹ اخبارتازہ ترین - اے پی پی۔ 15 مئی2024ء) چیئرمین بلوچستان بورڈ آف انٹرمیڈیٹ اینڈ سکینڈری ایجوکیشن کوئٹہ میر اعجاز عظیم بلوچ نے کہا ہے کہ امتحانی نظام کو جدید خطوط پر استوار کرنے کیلئے خود کار ڈیجیٹل سسٹم متعارف کرادیا گیا ہے، نقل ایک ناسور ہے جو ملک کی نئی نسل کو جہالت کے اندھیرے میں دھکیل رہا ہے ،بلوچستان حکومت اس ناسور کو ختم کرنے کے لئے کوئی کسر نہیں چھوڑ رہی ،ہم سب کو مل کر عملی جدوجہد کرنی ہوگی ،بورڈ نے ہمیشہ قومی امنگوں کے مطابق صاف و شفاف امتحانات پر امن ماحول میں منعقد کر کے یہ پیغام دیا ہے کہ بلوچستان بورڈ اپنے قومی فریضہ کی ادائیگی میں ہمہ وقت تیارہے ۔

ان خیالات کا اظہار انہوں نے جاری امتحانات کے دوران مختلف سینٹرز کے دورے کرتے ہوئے طلباء و طالبات سے بات چیت کرتے ہوئے کیا ۔

(جاری ہے)

اس موقع پرڈپٹی کنٹرولر بلوچستان بورڈ قاضی محمد انور بھی انکے ہمراہ تھے۔ انہوں نے کہا کہ بلوچستان بورڈ نے تاریخ رقم کر کے پاکستان کے دیگر بورڈ سے پہلے زرلٹ کا اعلان کیا اور بلوچستان کے طلباء و طالبات کے دل جیت لیے ،میری کوشش ہوگی کہ اس سال بھی بلوچستان بورڈ پہلے رزلٹ کااعلان کرے ۔

انہوں نے کہا کہ امتحانی نظام کو جدید خطوط پر استوار کرنے کے لئے خود کار ڈیجیٹل سسٹم متعارف کرادیا گیااور ڈیجیٹل اٹینڈنس اینڈ مانیٹرنگ سسٹم "ڈیمز" کے تحت امتحانی عملے ، اور امتحانات میں شریک طلبہ سمیت مانیٹرنگ اسٹاف کی رئیل ٹائم آن لائن حاضری جدید خود کار ڈیجیٹل سسٹم کے ساتھ ساتھ بلوچستان بورڈ میں اصلاحات کا عمل جاری ہے اور ہماری کوشش ہے کہ اصلاحاتی منصوبوں کو عملی جامہ پہنا کر بورڈ کے امور سے متعلق عوام کو زیادہ سے زیادہ سہولیات ان کی دہلیز تک پہنچائی جائیں گی۔

اس سے قبل آن لائن ڈگری ، ڈی ایم سی کا اجرا، اسناد کی تصدیق اور ری کائونٹنگ پروسیجر کی سہولیات فراہم کردی گئی ہیں۔چیئرمین بورڈ میر اعجازعظیم بلوچ نے کہا کہ دنیا میں وہی اقوام ترقی یافتہ ہیں جنہوں نے علم کو اپنا ہتھیار بنایا اور اپنے ملک سے جہالت کا خاتمہ کیا ،ہمیں بھی اپنے ملک کی تعمیر و ترقی کے لئے علم کی شمع کو مزید روشن کرنا ہوگا ،اسی میں ہم سب کی کامیابی ہے۔